Ҳукумати Тоҷикистон аллакай муддати се сол аст, ки корхонаи дӯзандагии “Гулистон Душанбе”-ро, ки қаблан ба миллардери украинӣ Дмитрий Фирташ тааллуқ дошт, фурӯхта наметавонад.
Нархи ибтидоии корхона поин бурда шуда, лекин харидорон пайдо нашуданд. Бастаи пурраи саҳмияҳои корхона аз моҳи деакбри соли гузашта ба фурӯш гузошта шудааст.
Фурӯши саҳмияҳои ҶСК “Гулистон Душанбе” бо шумори умумии 242 200 дона дар як лот ба нақша гирифта шудааст. Нархи ибтидоии лот – 24 млн. 220 ҳазор сомонӣ (наздики 2,6 млн. доллар), қайд мешавад дар сомонаи Корхонаи воҳиди давлатӣ оид ба ташкили фурӯши амволи давлатӣ.
Арзон карданд, вале ин ҳам илоҷи кор нашуд
Корхона моҳи сентябри соли 2016 ва моҳи январи соли 2017 ба фурӯш гузошта шуд, вале харидорони имконпазир таваҷҷуҳ зоҳир накарданд. Пас аз поин бурдани нархаш боз моҳи декабри соли гузашта низ ба фурӯш гузошта шуд.
Нархи ибтидоии бастаи пурраи саҳмияҳои корхна моҳи сентябри соли 2016 ва моҳи январи соли гузашта 32 млн. сомонӣ (беш аз 4 млн. доллар) муқаррар шуда буд, ки дар муқоиса бо арзиши ибтидоии ҳозираи бастаҳо 7 млн. 780 ҳазор сомонӣ камтар аст.
ИЗОБРАЖЕНИЕ Фабрикаи "Гулистон Душанбе"
Амволи мусодирашудаи Фирташ
Моҳи апрели соли 2014 бо қарори суди иқтисодии шаҳри Душанбе корхонаи мазкур ба моликияти давлат гузашт. Суд даъвои Агентии назорати давлатии молиявӣ ва мубориза бо коррупсияро дар бораи ғайриқонунӣ хусусигардонии корхона қонеъ намуд. Сипас корхона аз ҶСП «Гулистон» ва ҶСК «Гулистон Душанбе» табдили ном кард.
ҶСП «Гулистон» соли 2002, замони вазири саноати Тоҷикистон будани Зайд Саидов хусусӣ гардонида шуд. Дар Агентии зиддифасод бар ин назаранд, ки Саидов бо истифода аз ваколатҳои мансабӣ ба ғайриқонунӣ хусусигардонии ин корхона мусоидат кардааст. Он замон бастаи назоратии саҳмияҳо – 95%-ро тоҷири украинӣ Дмитрий Фирташ ва 5%-ашро Хайрулло Саидов, писари Зайд Саидов харида буданд.
Пешоҳанги истеҳсолоти дӯзандагӣ
Дар сомонаи корхона гуфта мешавад, фабрикаи «Гулистон Душанбе» асосгузори истеҳсолоти дӯзандагӣ дар Тоҷикистон ва аз соли 1933 корхонаи аз ҳама бештар соҳибтаҷрибаи истеҳсоли сарулибоси мардона ва занона мебошад.
Соли 2004 корхона бо таҷҳизоти такмилёфта таъмин гардид, ки ба дӯхтани сарулибоси ҳама гуна навъ имкон фароҳам овард. Иқтидори аввалияи истеҳсолии корхонаи “Гулистон” – беш аз 3 млн. адад маҳсулот дар як сол мебошад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
