Собиқадорони Ҷанги Бузурги Ватанӣ (ҶБВ), ки дар шаҳри Душанбе зиндагӣ мекунанд, дар остонаи ҷашни Рӯзи Ғалаба аз ҳисоби фонди захиравии раиси пойтахт ҳар кадоме ба маблағи 1 ҳазору 500 сомонӣ кумакпулии якдафъаина мегиранд.
Бино ба иттилои сомонаи расмии мақомоти шаҳрдории Душанбе, мувофиқи қарори аз ҷониби раиси пойтахт Рустами Эмомалӣ баимзорасида, шахсони ба собиқадорони ҷанг баробаркардашуда низ бо кумакпулӣ қардонӣ мешаванд.
Аз ҷумла, ба шахсони бо ордену медалҳои ҳарбӣ дар ақибгоҳ солҳои ҶБВ сарфарозгардида, шахсоне, ки зиёда аз шаш моҳ дар ақибгоҳ дар давраи ҷанг кор кардаанд, маъюбони амалиётҳои ҷангӣ дар қаламрави давлатҳои дигар (Афғонистон), маъюбони садамаи Нерӯгоҳи барқӣ-атомии Чернобил ва оилаҳое, ки саробони онҳо ҳангоми ҳимояи сохти конститутсионӣ ҳалок гардидаанд, ба ҳар кадоме ба андозаи 800 (ҳаштсад) сомонӣ кумакпулӣ ҷудо мешавад.
Бо ин мақсад аз фонди захиравии раиси пойтахт 697 ҳазору 800 сомонӣ маблағ ҷудо гардида, муовинони раиси шаҳри Душанбе маблағҳои ҷудогардидаро ба иштирокчиён ва маъюбони ҶБВ зимни аёдати шахсӣ дар манзили истиқоматиашон ботантана на дертар аз 4 майи соли ҷорӣ месупоранд.
Қобили зикр аст, ки сафи собиқадорони Ҷанги Бузурги Ватанӣ дар Тоҷикистон сол то сол кам мешавад. Имрӯз онҳо ҳамагӣ 244 нафар боқӣ мондаанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
