Роҳи Душанбе-Хуҷанд бар асари лағжиши як кӯҳпора дар километри 119-ум баста аст, хабар медиҳад дафтари матбуоти ширкати IRS.
Бино ба иттилои манбаъ, субҳи имрӯз дар километри 119- уми роҳи автомобилгарди Душанбе-Чаноқ лағжиши кӯҳпораи азим ба амал омада, дар натиҷаи ин ҳодиса қитъаи зикршудаи роҳ фурӯ рафтааст.
Гуфта мешавад, ба назари мутахассисони соҳа, ин қитъаи роҳро аз нав бунёд кардан лозим меояд.
– Аз лаҳзаҳои аввали рух додани ин ҳолат кормандони филиали Ширкат ва техникаҳои пуриқтидор ба маҳалли ҳодиса сафарбар шуда, бартарафсозии кӯҳпора идома дорад, – омадааст дар маълумоти ширкат.
Зимнан зикр мегардад, ки ҳоло ҳаракати тамоми намуди воситаҳои нақлиёт муваққатан боздошта шуда, ҷиҳати ҳарчи зудтар барқарор намудани рафтуомади воситаҳои нақлиёт тариқи ин роҳ ҳамаҷониба кӯшиш ба харҷ дода мешавад.
Котиби матбуотии филиали ширкати IRS дар Тоҷикистон Далер Мерганов ба “Азия-Плюс” дар ин робита иттилоъ дод, ки кормандони ширкат барои ҳадди ақал таъмин кардани равуои нақлиёт бо тартиби яктарафа то нимаи ҳамин рӯз кӯшиш хоҳанд кард.
“Яъне ба ҳаракати воситаҳои нақлиёт тариқи як хати гузар бонавбат аз ду самт иҷоза дода мешавад”, – хабар дод Мерганов.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
