Чанд тан аз сокинони вилояти Суғд ният доштанд, ки наздики 6 тонна гӯшти говҳои мурдаро дар бозори Панҷшанбеи шаҳри Хуҷанд фурӯшанд, лекин корашон барор нагирифта, саривақт дастгир шуданд.
Ин ҳодиса санаи 14 май рух додааст: зимни баргузории рейд аз ҷониби кормандони нозироти санитариву эпидемиологии вилоят, маркази бехатарии озуқаворӣ ва КДАМ дар қаламрави ноҳияи Бобоҷон Ғафуров, роҳи мошингарди Ашт-Хуҷанд автомашина бо 27 сар говҳои мурда (наздики 6 тонна) боздошт мешавад.
Дар ин бора дар шабакаи давлатии телевизиони вилояти Суғд гузориш пахш гардида, қайд шуд, ки дар ин робита 4 нафар боздошт шудаанд, ки ин гӯштро дар бозори марказии вилоят – Панҷшанбеи шаҳри Хуҷанд ба фурӯш бароварданӣ будаанд.
Дар он зикр гардид, ки фурӯшандагони бозор 27 сар чорвои мурдаро дар Ашт харидаанд: онҳо ба фурӯши минбаъдаи гӯшти чорвои мурда розӣ шуда, ба ин ноҳия меоянд, аммо ҳангоми бозгашт ба Хуҷанд бо борашон боздошт мешаванд.
Қайд шуда буд, ки ин чорво бар асари заҳролудшавӣ аз каролин ҳаром мурда, агар ба дасти харидорон мерасид, ба заҳролудшавии одамон боис мегардид.
Нисбати боздоштшудагон мутобиқи моддаи 209 Кодекси ҷиноятии Тоҷикистон (Истеҳсол, нигоҳ доштан, интиқол ё ба соҳибияти каси дигар додани мол ва ё маҳсулот, иҷрои кор ё хизматрасоние, ки ба талаботи бехатарӣ ҷавоб намедиҳад) парвандаи ҷиноятӣ боз шудааст.
Қобили зикр аст, ки аз оғози сол дар вилояти Суғд беш аз 100 тонна маҳсулоти пастсифати хӯрокворӣ, аз ҷумла 47 тонна гӯшти мурғи қимашуда мусодира гардидааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
