Ҳамсари Маҳмадсаид Убайдуллоев, раиси Маҷлиси миллии Тоҷикистон субҳи 2 июл ба таври ногаҳонӣ вафот кардааст.
Тавре сомонаи расонаи мустақили “Ахбор” хабар медиҳад, ба гуфтаи наздиконаш, ӯ бемории ҷиддие надошт ва фақат чанд рӯзи охир аз дарди гулӯ ранҷ мекашид. Ҳамсари Убайдуллоев дар мазҳари ом ҳеҷ гоҳ зоҳир намешуд ва сирф ба тарбияи фарзандонаш машғул шуда, ба масоили давлатӣ дахолат намекард.
Мардуми зиёде, аз ҷумла мансабдорони баландпоя барои изҳори таъзия ба манзили Убайдуллоев дар маркази Душанбе меоянд. Президенти Тоҷикистон Эмомалӣ Раҳмон ва раиси шаҳри Душанбе Рустами Эмомалӣ низ барои изҳори таъзия омадаанд.
Маросими намози ҷанозаи Рӯзигул Каримова субҳи 3 июл, соати 9 дар масҷиди марказии шаҳри Душанбе баргузор мешавад.
Ҳамсари Убайдуллоев дар ҳоле аз олам чашм пӯшид, ки худи Убайдуллоев бо сафари корӣ дар Русия қарор дошт.
Маҳмадсаид Убайдуллоев ва ҳамсараш се фарзанд – ду писар ва як духтар доранд.
Писари калонии онҳо Ҷамолиддин Убайдулло, ки 39 сол дорад, дар Порис дар мақоми сафири Тоҷикистон дар Фаронса ва Намояндаи Тоҷикистон дар ЮНЕСКО – Идораи илму фарханги СММ кор мекунад. Хабари даргузашти модараш ба Ҷамолиддин Убайдулло дар ҳоле расид, ки ӯ дар Порис қарор дошт.
Амирҷон Убайдуллоҳ, писари дуюми ин хонавода 37 сол дошта, мушовири калони бахши ёрдамчии президент дар масоили иқтисодӣ мебошад. Ӯ қаблан дар Вошингтон, пойтахти Амрико чанд сол ба ҳайси намояндаи Тоҷикистон дар Бонки ҷаҳонӣ ва Сандуқи байналмилалии пул кор мекард ва соли 2013 ба Тоҷикистон баргашта, қариб 6 сол муовини сардори раёсати молияи Дастгоҳи президент буд.
Духтари шахрдори собиқи Душанбе Нигина Убайдуллоева, ки 30 сол дорад, чанд сол боз бо шавхараш дар Амрико зиндагӣ мекунад.
Маҳмадсаид Убайдуллоев 67 сол дошта, то соли 2017, дар тӯли қариб 20 сол ҳамзамон бо раёсати Маҷлиси миллӣ – палатаи болоии парлумони Тоҷикистон шаҳрдори Душанбе низ буд. Президент Эмомалӣ Раҳмон моҳи январи соли 2017 ба ҷои Убайдуллоев писари калониаш Рустами Эмомалиро раиси шаҳри Душанбе таъйин кард.
Ҳайати кормандони гурӯҳи расонаҳои “Азия-Плюс” ба пайвандону наздикони марҳума изҳори тасаллият намуда, барояшон аз даргоҳи Худованд сабри ҷамил хоҳонанд.
