Бо қарори ҳукумати Тоҷикистон Абдулмаҷид Муминзод сардори нави Хадамоти зиддиинҳисории ҷумҳурӣ таъин шуд.
Қаблан ӯ ба ҳайси муовини якуми раиси Раиси Кумитаи давлатии сармоягузорӣ ва идораи амволи давлатии Тоҷикистон фаъолият дошт.
Эмомалӣ Раҳмон ҳамучунин дар бораи аз вазифаҳояшон озод шудани муовинони сардори Хадамоти зиддиинҳисорӣ Назар Одиназода ва Абдусамад Саидмуродзода қарорҳо ба имзо расонид.
Бо қарорҳои ҳукумат Дилшод Музаффарзода муовини якум ва Зайдулло Мӯсозода муовини сардори Хадамоти зиддиинҳисорӣ таъин шуданд.
Ёдрас мекунем, ки бо қарори ҳукумати Тоҷикистон аз 22 июл Икромиддин Сироҷиддин Вализода аз вазифаи сардори Хадамоти зиддиинҳисории назди ҳукумати Тоҷикистон “бо сабаби ба кори дигар гузаштан” озод шуд.
Икромиддин Вализода ҳамагӣ се моҳ пеш – 23 апрели соли 2019 роҳбари Хадамоти зиддинҳисорӣ таъин шуда буд, дарҳол вақте ки ин хадамот ташаббускори боло бурдани тарифҳои интернет гардида буд, ки миёни аҳолии кишвар сарусадоҳои зиёд ба бор оварда буд.
То ин таъинот Вализода вазифаи муовини директори Агентии “Тоҷикстандарт”-ро ишғол мекард. Дар ин вазифа ӯ Саъдӣ Қодирзодаро иваз намуд, ки муовини раиси Дастгоҳи иҷроияи президент таъин шуд.
Хадамоти зиддиинҳисории назди Ҳукумати Тоҷикистон моҳи апрел зери танқиди шадиди корбарони шабакаҳои иҷтимоӣ қарор гирифт. Хадамот бо қарори худ аз 4 марти соли 2019 ширкатҳои алоқаи мобилиро уҳдадор намуд, ки нархи 1 Мб интернетро на камтар аз 5 дирам бе назардошти аксизу андоз муқаррар намоянд.
Корбарон бештар аз он дар таҷҷуб буданд, ки маҳз сохторе, ки бояд ҳуқуқҳои истеъмолгаронро ҳимоя карда, ҷорӣ шудану болоравии ҳар гуна пардохтҳоро пешгирӣ кунад, ташаббускори ин иқдом аст.
Бо фармони президенти Тоҷикистон, Икромиддин Сироҷиддин Вализода иҷрокунандаи вазифаи раиси ноҳияи Кӯшониёни вилояти Хатлон таъин шуд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
