Марҳилаи ҷарроҳии ҳафтум ва охирини Осияи Шерзод бо мувафақият гузашт. Ва фардо баъди зиёда аз як моҳ аввалин маротиба ӯро ба ҳавлии беморхона барои дидорбинии наздиконаш мебароранд, иттилоъ дод ба “Азия-Плюс” Тоҳир Зубайдов, мудири шӯъбаи бемориҳои сӯхтаи маркази шаҳрии №3.
Ба гуфтаи Зубайдов, бо хоҳиши Осия, ки зиёд мехоҳад бародарон ва дигар аъзоёни оилаи худро бубинад, фардо ба ҳавлии беморхона бароварда мешавад. “Гарчанде дар роҳ гаштану нишастан Осия азоб мекашад ва базӯр менишинад, аммо хеле мехоҳад бо наздиконаш дидорбинӣ кунад. Ва мо ба ӯ ваъда додем, ки фардо наздиконатро хоҳӣ дид”.
Номбурда ҳамчунин илова кард, ки се рӯз қабл ҷарроҳии 7-уми ва охирини барқарор намудани саломатии Осия низ ба хубӣ анҷом ёфт, ки худи табибони тоҷик онро гузаронидаанд. Ва дар оянда ӯро ҷарроҳиҳои косметикӣ интизор аст. Вале, мегӯяд, Осияро то ҳол ба палата нагузаронидаанд ва дар назар аст, ки дар шӯъбаи эҳёгарӣ нигоҳубин карда шавад.
“Осияро ба он хотир ба палата нагузаронидем, чун вақте аз шӯъбаи эҳё ба палата гузаронида шавад, наздикону пайвандон зиёд ба аёдаташ меоянд ва имкони ворид шудани вирусҳо ба захмаш пайдо мешавадт”, – гуфт Зубайдов.
Вазъи саломатии Осияро табибон хуб арзёбӣ мекунанд ва умед аст ба зудӣ саломатиаш беҳтару хубтар гардад.
Дар нишасти хабарии Вазорати тандурустӣ низ гуфта шуд, ки ҷарроҳиҳои барқарор намудани саломатии Осияи Шерзод гузаронида шуда, дар оянда низ Вазорати тандурустӣ барои табобати ноболиғ тамоми чораҳоро меандешад.
Бояд гуфт, барои муоинаи Осия Зулфоноваи 6-сола, сокини шаҳри Душанбе, ки санаи 19 июн бо ҷароҳатҳои вазнин аз сӯхтор ба беморхонаи №3-и пойтахт бистарӣ гашта буд, аз Олмон профессори шинохтаи тиб Эдгар Бимер бо даъвати президенти Тоҷикистон Эмомалӣ Раҳмон ба Душанбе ташриф овард.
