Дар шаҳри Гулистони вилояти Суғд Президенти Тоҷикистон Эмомалӣ Раҳмон рӯзи 21 август Дабири кулли Созмони Ҳамкории Иқтисодӣ (СҲИ) Ҳодӣ Сулаймонпурро ба ҳузур пазируфт.
Бино ба иттилои хадамоти матбуоти сарвари давлат, дар ҷараёни мулоқот ҷонибҳо вазъи феълӣ ва дурнамои муносибатҳои ҳамкории ҳукумати Тоҷикистон ва Созмони ҳамкории иқтисодиро мавриди баррасӣ қарор доданд.
Гуфта мешавад, Эмомалӣ Раҳмон аз сатҳи имрӯзаи ҳамкорӣ дар бахшҳои тиҷорат, ҳамлу нақли транзитию нақлиётӣ, ҳамчунин таҳкими робитаҳои фарҳангиву гуманитарӣ, изҳори қаноатмандӣ кард.
Таъкид гардид, ки Тоҷикистон барои рушди минбаъдаи ҳамкорӣ дар соҳаҳои тиҷорат, сармоягузорӣ, энергетика, нақлиёту коммуникатсия, саноат, кишоварзӣ, ҳифзи муҳити зист ва туризм бо кишварҳои аъзои СҲИ манфиатдор аст.
Ҷонибҳо зимни мулоқот ҳамчунин масъалаҳои рушди туризми минтақавӣ, истиқрори сулҳу субот дар кишвари ҳамсояи Афғонистон, рушди иқтисодию иҷтимоии ин кишвар ва дигар мавзуъҳои мавриди таваҷҷуҳро муҳокима карданд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
