Муовини раиси бонки барҳамхӯрдаи “Тоҷпромбонк” Маҳмадулло Мирзоев дар боздоштгоҳи муваққатӣ (СИЗО)-и Душанбе аз олам даргузаштааст.
“Ӯ ҳанӯз аввали моҳи август даргузашта, ҷасадаш дарҳол ба наздиконаш дода шуд. Ҷасади ӯ дар яке аз қабристонҳои Ҳисор ба хок супурда шуд. Бо гузашти қариб як моҳ даргузашти ӯ маълум шуд”, – хабар дод ба “Азия-Плюс” як манбаъ аз доираҳои бонкии Тоҷикистон.
Бино ба иттилои манбаъ, Маҳмадулло Мирзоев ба бемории қанд гирифтор будааст. Собиқ муовини раиси “Тоҷпромбонк” моҳи феврали соли 2019 ба иттиҳоми қаллобӣ боздошт шуд.
Собиқ раиси “Тоҷпромбонк” Ҷамшед Зиёев низ баҳори соли 2018 ба қаллобӣ, камомади воситаҳои амонтагузорон айбдор карда шуда, айни замон таҳти тафтишот қарор дорад.
Қаблан зикр шуда буд, ки замони роҳбарӣ ба «Тоҷпромбонк» Ҷамшед Зиёев воситаҳои ҷалбшудаи амонатгузоронро ба равнақи тиҷорати худаш равона мекардааст. Инро гӯё бо роҳи ба номи хешовандону наздиконаш ба расмият даровардани қарзҳо амалӣ мекардааст.
Қобили зикр аст, ки иҷозатномаи «Тоҷпромбонк» охири моҳи феврали соли 2017 бозхонд шуда, аввали моҳи марти соли гузашта Суди иқтисодии Душанбе дар бораи оғози барҳамдиҳии муассиса қарор содир намуд.
Соли 2018 Палатаи ҳисоби Тоҷикистон дар “Тоҷпромбонк” ба маблағи 270 млн. сомонӣ (28,6 млн. доллар) зиёни молиявӣ ошкор намуд.
Дар ҳамин ҳол, як манбаъ дар суди ноҳияи Синои пойтахт маълумоти баъзе ВАО-ро дар бораи дар ин ҷо идома доштани мурофиа нисбати ӯ рад намуд. “Ин асоси воқеӣ надорад”, – иброз дошт манбаъ.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
