Бинобар сабаби беморӣ қабули 44 нафар довталабон ба Донишгоҳи давлатии тиббии Тоҷикистон рад шуд.
Тавре ба “Азия-Плюс” аз Донишгоҳи мазкур хабар доданд, рад шудани қабули ин шумор донишҷӯён мувофиқи қарори ҳукумат аз соли гузашта сурат гирифтааст.
Ба ин қарор рӯйхате бо зикри 50 беморӣ замима шудааст, ки қабули довталабони гирифтори чунин бемориҳо ба муассисаҳои тиббӣ манъ мешавад.
Бино ба иттилои манбаъ, ошкор шудааст, ки аксари ин донишҷӯён ба бемории далтонизм (як хел иллати чашм, ки мубталои он баъзе рангҳоро фарқ карда наметавонад) гирифтор будаанд.
“Зимни аз муоина гузаштан дар комиссияи махуси тиббии назди донишгоҳ дар 37 нафар довталабон ҳамин беморӣ ва дар боқимонда гепатити “В” ошкор шуда, чун ин бемориҳо дар рӯйхат зикр шудаанд, таҳсили онҳо дар донишгоҳи тиббӣ манъ аст. Ҳарчанд баллҳои бархе аз онҳо хеле баланд бошад ҳам, мо онҳоро қабул карда наметавонем”, – хабар дод як манбаъ дар донишгоҳ.
Зимнан зикр шуд, ки ҳангоми интихоби муассисаи таълимии самти тиббӣ дар Маркази миллии тестӣ довталабонро дар бораи амал доштани чунин қарор огоҳ мекунанд, лекин шояд худи онҳо аз бемориашон хабар надоранд ё ин ҳолатро нодида мегиранд.
Маводи мо бо суроғаҳои news.tj ё asiaplustj.info тариқи браузери Opera (ба кор даровардани VPN лозим аст) қобили дарёфт аст. Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
