Дар суди шаҳри Хуҷанд ду мурофиа тибқи огоҳона сироят кардан ба Вируси норасоии масунияти одам (ВНМО, ВИЧ) ба итмом расид.
Тавре ба “Азия-Плюс” аз суди мазкур хабар доданд, мурофиаҳо алоҳида нисбати занони сокини 41-солаи шаҳри Хуҷанд ва сокини 45-солаи ноҳияи Бобоҷон Ғафурови вилояти Суғд сурат гирифтааст.
Бино ба иттилои манбаъ, мақоми онҳо ҳамчун гирифтори ин беморӣ дар Маркази мубориза бо Аломати пазируфтаи норасоии масуният (АПНМ, СПИД) тасдиқ шудааст.
“Дар он ҷо ба онҳо дар бораи чунин мақом доштанашон хабар дода, огоҳ карда буданд, ки барои сироят накардани дигарон, чораҳои пешгириро риоя намоянд, лекин бо вуҷудӣ огоҳӣ, онҳо бо мардон ҳамхобагӣ карда, онҳоро зери хатар гузоштаанд”, – қайд кард манбаъ.
Зимнан зикр шуд, ки суд онҳоро мутобиқи моддаи 125, қ. 1-и Кодекси ҷиноятии Тоҷикистон (Сироят кардан бо инфекцияи ВИЧ. Дидаю дониста, таҳти хавфи сироят бо инфекцияи ВИЧ гузоштани шахси дигар) гунаҳкор эътироф намуда, ҳар кадомеро ба 1 соли зиндони низомаш умумӣ маҳкум намуд.
Ёдрас мекунем, ки дар нишасти хабарии ҷамъбасти соли 2018 прокурори вилояти Суғд Ҳабибулло Воҳидов хабар дода буд, ки танҳо давоми моҳи январи соли 2019 нисбати шахсони сироятёфта аз ВНМО, ки дидаву дониста шахсони дигарро сироят кардаанд, 7 парвандаи ҷиноятӣ боз шудааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
