Бар асари таркиш назди бемористони ҳукумат дар музофоти Зобули Афғонистон дастикам 7 нафар ҳалок ва 85 нафар захмӣ шуданд. Дар ин бора телевизиони TOLOnews хабар медиҳад.
Ҳодиса тахминан соати 6-и субҳ рух дода, биноҳои маъмурӣ ва манзилҳо сахт осеб диданд. Қайд мешавад, ки назди макони таркиш бинои Раёсати миллии амният (NDS) ҷойгир буда, кормандони он аз таркиш осеб надидаанд.
Гуфта мешавад, аксари осебдидагон аз таркиш ба бемористонҳои хусусии музофот фиристода шудаанд.
Масъулияти ин амалро ҳаракати “Толибон” ба дӯш гирифта, зикр кард, ки ҳадафи таркиш дафтари кории NDS буд.
Рӯзи 5 сентябр бар асари таркиш дар маркази шаҳри Кобул ду низомии НАТО ҳалок шуданд, ки яке аз онҳо амрикоӣ буд. “Толибон” изҳор доштанд, ки дар ин амал ҳам даст доранд. Сипас президенти ИМА Доналд Трамп баргузории гуфтушунидҳои махфиро бо пешвоёни ҳаракат ва роҳбари Афғонистон бекор кард.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
