Раиси шаҳри Душанбе Рустами Эмомалӣ дар бораи ҳавасмандгардонии моддӣ-маънавии омӯзгорони шогирдонашон дар олимпиадаҳои ҷумҳуриявӣ ба ҷойҳои ифтихорӣ сазоворшуда қарор ба имзо расонид.
Барои ҳавасмандсозии омӯзгорон аз буҷети шаҳр 129 ҳазор сомонӣ ҷудо мешавад. Дар ин бора котиби матбуотии раиси пойтахт Абдумаҷид Ҳакимзода ба “Азия-Плюс” хабар дод.
“Бо мақсади дастгирӣ ва ҳавасмандгардонии моддӣ-маънавии омӯзгорони шогирдонашон дар олимпиадаҳои ҷумҳуриявӣ ба ҷойҳои ифтихорӣ сазоворшуда, тарғиби таҷрибаи босамари омӯзгорӣ, баланд бардоштани мақоми омӯзгор дар ҷомеа бахшида ба таҷлили «Рӯзи омӯзгорон» 43 муаллим аз мақомоти шаҳрдорӣ ҳар кадом бо 3 ҳазор сомонӣ мукофотпулӣ қадрдонӣ мешавад”, – гуфт ӯ.
Дар қарор ба муовинони раиси шаҳр дастур дода шудааст, ки иҷрои бандҳои онро зери назорат гиранд.
Рӯзи ҷаҳонии омӯзгор, ки ҳамасола дар зиёда аз 100 кишвар ҷашн гирифта мешавад, соли 1994 таъсис дода шуд. Асоси таърихии он Конфронси махсуси байниҳукуматӣ дар бораи мақоми омӯзгорон буд, ки 5-уми октябри соли 1966 дар Париж доир гардид.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
