Корбарон дар хориҷи кишвар аз сабаби бозшавии сусти сомонаҳои минтақаи домении Tj онҳоро кушода наметавонанд. Бархе аз мутахассисон бар ин назаранд, ки торнамоҳо аз сабаби суръати сусти трафики беруна дастнорасанд.
Дар минтақаи домении Tj бештар сомонаҳои сохторҳои давлатӣ, аз қабили meteo.tj, investcom.tj, торнамоҳои Минтақаҳои озоди иқтисодӣ ҷойгир буда, онҳо барои корбарон дар хориҷи кишвар дастнорасанд. Дар дохили ҷумҳурӣ агар кори VPN қатъ карда шавад, сомонаҳо зуд кушода мешаванд. Ё бозшавии баъзе сомонаҳо тӯлонӣ давом мекунад.
Тавре ба “Азия-Плюс” як мутахассиси бахши IT (технологияҳои иттилоотӣ) хабар дод, сабабҳои чунин вазъ комилан фаннӣ (техникӣ) буда, ба хостинг ва интернети гаронарзиш дар Тоҷикистон марбутанд.
Ба гуфтаи ӯ, мувофиқи қонунгузорӣ, ҳамаи сомонаҳои мақомоти давлатӣ бояд дар серверҳои ватанӣ хостинг дошта бошанд.
“Аз сабаби гаронии арзиши интернет ширкатҳои таъмингари хостинг баҳри зиёд боло набурдани нархи дастрасӣ ба сервер, захираҳои хеле маҳдуд бо долон (канал)-и тангро медиҳанд, лекин арзонтар. Сохторҳои двлатӣ ва чанде аз ширкатҳои ватанӣ бо мақсади сарфакорӣ маҳз ҳамин гуна хостингҳои арзонро мехаранд. Чун муроҷиат аз хориҷи кишвар ба сомона бо долони танг зиёд шавад, он умуман боз намешавад ё бозшавиаш хеле тӯлонӣ ҷараён мегирад”, – шарҳ дод коршинос.
Аз ин рӯ, ба қавли ӯ, дар дохили Тоҷикистон сомона муътадил кор карда, дар берун аз ҳудуди кишвар қариб дастнорас аст.
Хадамоти алоқа, ки масъули минтақаи домении Tj мебошад, ин масъаларо ҳеҷ гуна шарҳ намедиҳад.
Моҳи май корбарон дар хориҷи кишвар муддати як ҳафта ба сомонаҳои сохторҳои давлатӣ ворид шуда натавонистанд. Сабабаш то ҳол номаълум боқӣ мемонад.
Нимаи моҳи май сокинони Тоҷикистон муддате аз истифодаи замимаи ҷустуҷӯ ва дигар хидматгузориҳои Google маҳрум шуданд. Дастрасӣ ба шабакаи ҷустуҷӯйи Yandex низ маҳдуд шуда буд.
Қатъи дастрасӣ ба сомонаҳо маъмулан аз ҷониби ҳукуматдорон шарҳ дода намешавад. Аммо дар мавриди қатъи дастрасӣ ба Google аз Хадамоти алоқа хабар дода буданд, ки он “аз хориҷи кишвар сурат мепазирад”.
Asia-Plus низ то ҳол дастнорас аст
Сомонаи хабаргузории “Азия-Плюс” қариб як сол дастнорас аст. Қатъкуниҳои дастрасӣ пештар ҳам сурат мегифтанд, аммо ба як давра, яъне муддате қатъу муддате дастрас мешуданд.
Ин қатъи дастрасӣ муддати аз ҳама зиёдтар идома дорад. Моҳи августи соли гузашта пас аз амали террористӣ дар ноҳияи Данғара, ки бар асари он сайёҳони хориҷӣ ҳалок шуданд, дасрасӣ ба шабакаҳои иҷтимоӣ ва як қатор сомонаҳои хабаргузориҳо қатъ шуд.
Он замон ба ҷуз сомонаҳои хабаргузориҳо ва шабакаҳои иҷтимоӣ, дастрасӣ ба анонимайзерҳо (қуфлшиканҳо), ки тариқи онҳо вуруд ба сомонаҳои дастрасиашон қатъшуда имкон дошт, низ маҳдуд шуд. Дар воридшавӣ ба мессенҷерҳо низ мушкилӣ вуҷуд дошт.
Баъди ҳодисаи Данғара дастрасӣ ба сомонаи “Азия-Плюс” низ қатъ шуда, муддати қариб ду моҳ сомона дастнорас буд. Нимаи моҳи октябр дастрасӣ барқарор шуд, аммо аз 2-юми ноябр то ҳол боз дастнорас аст.
Аз 19-уми августи соли равон ду домени асосии «Азия-Плюс» – news.tj ва asiaplus.tj ҳатто тариқи VPN дастнорасанд. Он рӯз дар сабти техникии DNS-сервери мо дар калимаи «cloudflare» ба ҷойи ҳарфи “О” рақами 0 (сифр) пайдо шуд.
Айни замон ба сомонаи иттилоотии “Азия-Плюс” тариқи VPN бо домени нав – asiaplustj.info метавон ворид шуд.
Ҳамчунин хабарҳои моро дар каналҳои Telegram https://t.me/asiaplus (ба забони русӣ), https://t.me/asiaplustj (ба забони тоҷикӣ) ва дар Viber https://viber.com/asia-plus дарёфт карда метавонед. Хабарҳои мо дар саҳифаи фейсбукии мо https://www.facebook.com/newstj, Дзен-канал – https://zen.yandex.ru/newstj ва Инстаграм – https://www.instagram.com/asiaplustj/ низ қобили дарёфт аст.
Дар робита ба ин мушкил почтаҳои электронии мо низ аз кор монда буданд. Ҳозир тариқи имайлҳои нави мо бо “Азия-Плюс” тамос гирифта метавонед:
* Идора – [email protected]
* Радио – [email protected]
* Хадамоти рекламавӣ – [email protected]
* Обуна ба иттилоот – [email protected]
* Масъалаҳои маъмурӣ – [email protected]
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
