Тоҷикистон содироти молу маҳсулоташро ба хориҷи кишвар коҳиш дода, ҳамзамон воридот меафзояд. Ин боиси камбуди асъор дар ҷумҳурӣ мешавад.
Давоми 9 моҳи соли ҷорӣ аз ҷумҳурӣ ба маблағи умумии 768,3 млн. доллар молу маҳсулот ба хориҷи кишвар бароварда шудааст, ки нисбат ба ҳамин давраи соли гузашта 5% ё худ 40 млн. доллар камтар аст.
Бино ба маълумоти Агентии омори ҷумҳурӣ, содироти маснуоти дӯзандагӣ ва бофандагӣ (қариб 30%), маҳсулоти кишоварзӣ (28,1%) ва минералӣ (17%), металҳои нимқиматбаҳо ва маснуот аз он (8,7%) кам шудааст.
Дар моҳҳои январ-сентябри соли равон ҳаҷми воридоти молу маҳсулот ба кишвар 2 млрд. 390 млн. долларро ташкил дод, ки дар қиёс бо ҳамин давраи соли гузашта 3,1% ё худ 72,1 млн. доллар зиёдтар аст.
Аз ҷумла, воридоти чарбу ва равғани чорво (49,9%), асбобу дастгоҳҳои оптикӣ ва тиббӣ (36,6%), маҳсулоти рустанӣ (22,1%), маҳсулоти саноати кимиё (12,4%), маҳсулоти тайёри ғизоӣ (8,9%), воситаҳои нақлиёт (8,1%) афзуд.
Ҳамин тариқ, касри (камбуди) тавозуни савдои хориҷии кишвар аллакай қариб ба 1 млрд. 622 млн. доллар расид.
Шарики асосии тиҷоратии Тоҷикистон тӯли 9 моҳи соли равон Русия боқӣ монда, ҳаҷми муомилоти молии дуҷониба 747 млн. долларро ташкил додааст. Ҳаҷми муомилоти мол байни Тоҷикистону Қазоқистон дар ин давра – 630 млн., Тоҷикистону Чин – 453 млн., Тоҷикистону Туркия – 275 млн. ва Тоҷикистону Ӯзбекистон – 264 млн. долларро ташкил додааст.
Қобили зикр аст, ки Бонки миллии Тоҷикистон вобастагии зиёди кишвар ба воридотро мушкили аслии таъмини бозори дохилӣ бо доллари амрикоӣ медонад.
“Мо ба воридот вобастагии зиёд дорем. Қариб ҳамаи маҳсулоти ниёзи аввал аз хориҷи кишвар ворид мешавад”, – гуфт аввали сол раиси Бонки миллии Тоҷикистон Ҷамшед Нурмаҳмадзода зимни нишасти хабарӣ дар Душанбе.
Ӯ қайд кард, ки соли 2018-ро ҷумҳурӣ бо тавозуни манфӣ – 2,1 млрд. доллар ҷамъбаст кард. Нисбат ба соли 2017 ҳаҷми воридоти маҳсулот дар соли гузашта 374 млн. доллар афзуд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
