Ширкати «Asian Express» шумори хатсайрҳои автобусро ба шаҳр ва ноҳияҳои ҷумҳурӣ кам кардааст. Аз сабаби нокофӣ будани мусофирон дар самтҳои Бохтар, Кӯлоб, Шаҳритус, Турсунзода асосан 1 ё 2 хатсайр ҳаракат мекунад.
Ба гуфтаи намояндаи ширкат, хатсайрҳо хароҷотро намебароранд. Вай ҳамунин қайд кард, ки дар ширкат воситаи нави роҳандозии хатсайрҳоро ҷустуҷӯ доранд, вале он кай амалӣ мешавад, саҳеҳ маълум накард.
Ронандагон мегӯянд, дарвоқеъ хароҷот зиёд аст: иҷораи автобус, сӯзишворӣ, таъмир ва ғайра.
Аммо ба қавли пулчинаки автобуси Душанбе-Турсунзода, ки айни замон ба хатсайр ҳамагӣ ду маротиба мебарояд, худи мусофирон бо автобусҳо равуо кардан намехоҳанд.
Вай гуфт, ки автобусҳои «Asian Express» ба дохили шаҳри Турсунзода ворид намешаванд ва терминал дар ҷойи ноқулай воқеъ аст.
“Барои то он ҷо рафтан мусофирон боз 2 сомонӣ пардохт мекунанд, аз ин рӯ, бо таксӣ ва микроавтобусҳо мустақиман аз шаҳр ба пойтахт рафтанро афзалтар медонанд”, – афзуд ӯ.
Ба ақидаи мусофирон, гап сари он нест, ки бо таксӣ рафтан афзалтар аст, чунки автобус барои онҳо арзонтару қулайтар мебошд.
“Гап дар он аст, ки ширкат вақти рафтани мусофиронро ба пойтахт ё минтақаҳо ба инобат намегирад, – мегӯяд яке аз мусофирон. – Баъзан хеле зиёд мунтазир шудан лозим меояд, зеро онҳо ҷадвали муайян надоранд. То комилан пур шудани ҷойҳои нишаст автобус ба ҳаракат намедарояд”.
Ғайр аз ин, ба мусофирон аз меъёр зиёд мусофир гирифтани ронандагони автобус писанд нест.
Дар ҳамин ҳол, дар ширкати «Asian Express» хабар доданд, ки автобусҳои бо сабабҳои техникӣ охири моҳи август ба хатсайри Душанбе-Турсунзода набаромада, аз 18 сентябр дубора ба равуо оғоз карданд.
“Нархи чипатҳо тағйир наёфтаанд – 8 сомонӣ ба як самт. Масофаи хатсайри Душанбе-Турсунзода 53 километр аст”, – гуфтанд дар ширкат.
Бино ба иттилои манбаъ, айни замон ба автобус аз пойтахт то дидбонгоҳи назоратии “Дӯстӣ” дар сарҳади Тоқикистону Ӯзбекистон (масофааш андаке бештар аз 60 км) талабот вуҷуд дорад.
“Ин масъала низ айни замон баррасӣ мешавад”, – хабар дод манбаъ.
Байни Тоҷикистону Ӯзбекистон равуои автобусҳо дар хатсайри нави Қӯқанд-Шайдон (ноҳияи Ашт) бо автобусҳои тамғаи «Исузу» ва таксиҳо шурӯъ шуд. Ҷипта ба як самт 23 ҳазор сӯм (тақрибан 25 сомонӣ) нарх дорад. Масофаи байни шаҳрҳо 84 км мебошад.
Қобили зикр аст, ки байни Тоҷикистону Ӯзбекистон хатсайрҳои дигари автосусҳо низ ҳаракат мекунанд, аз қабили Тошканд-Хуҷанд, Самарқанд-Панҷакент ва ғайра.
Мутаассифона, хатсайри қаблан роҳандозишудаи Душанбе-Тирмиз барҳам хӯрд. Ба гуфтаи намояндаи ширкат, автобус дар ин самт “бинобар зиёновар буданаш” ҳаракат намекунад.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
