Эмомалӣ Раҳмон имрӯз, 25-уми октябр Қонуни ҶТ «Дар бораи авф»-ро имзо кард.
Қонуни мазкур субҳи имрӯз дар Маҷлиси намояндагони Маҷлиси Олии ҶТ ба тасвиб расид.
Тибқи иттилои хадамоти матбуоти сарвари давлат, ин қонун дар асоси принсипи инсондӯстӣ ва ба муносибати ҷашни 25-солагии Конститутсияи Ҷумҳурии Тоҷикистон рӯзи 16-уми октябр ба Маҷлиси намояндагони Маҷлиси Олӣ аз ҷониби Президенти ҶТ пешниҳод шуда буд.
Қонун «Дар бораи авф» нисбат ба зиёда аз 20 ҳазор нафар шахсоне, ки ҷиноят содир кардаанд, аз ҷумла, ноболиғон, занон, маъюбон, шаҳрвандони хориҷӣ ва дигарон татбиқ мешавад.
Мақомоти дахлдор бояд дар муҳлати 2 моҳ қонунро пурра амалӣ карда, ба Президенти ҶТ ҳисоботи муфассал пешниҳод намоянд.
Матни пурраи қонун дар матбуот нашр карда мешавад.
Мувофиқи маълумоти пешакӣ, дар доираи 16-умин авфи даврони соҳибистиқлолии Тоҷикистон тақрибан 600 нафар гумонбаршудагон, айбдоршавандагон ва судшавандагон, 3100 нафар маҳкумшудагон аз муассисаҳои ислоҳӣ ва 3000 нафар маҳкумшудагон аз муассисаҳои ислоҳии сукунат озод мешаванд.
Ба ин тариқ, ҳамаи 11200 нафар шахсони мазкур аз ҷавобгарии ҷиноятӣ озод карда мешаванд.
Ҳамчунин аз 300 нафар занони маҳбус, ки айни ҳол дар муассисаҳои ислоҳии занона адои ҷазо мекунанд, 165 нафарашон ва аз 75 ноболиғе, ки дар муассисаҳои ислоҳии тарбиявӣ қарор доранд, 58 нафарашон ба озодӣ мебароянд.
Шахсоне, ки аз беэҳтиётӣ ҷиноят содир намудаанд, новобаста аз намуди ҷазо, аз адои ҷазо пурра озод карда мешаванд. Шахсоне, ки барои содир намудани ҷиноятҳои дараҷаи начандон вазнин ва дараҷаи миёна ба муҳлати то 5 сол маҳкум шудаанд, озод карда мешаванд.
Боз киҳо мавриди авф қарор мегиранд, дар ин матлаб зикр шудааст.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
