Намояндагони ширкатҳо бо чунин суолҳо ба идораи “Азия-Плюс” муроҷиат карданд: Дар кадом асос кормандони нозироти нақлиёт аз ронандагоне, ки роҳхат надоранд, ҷарима талаб мекунанд? Чаро ин варақаҳо баногоҳ барои ҳама ҳатмӣ шуда, Вазорати нақлиёт онҳоро бо пул мефурӯшад?
Дар Вазорати нақлиёт ба “Азия-Плюс” шарҳ доданд, ки ҳанӯз соли 2013 Дастури таҳия, баҳисобгирӣ, пуркунӣ ва коркарди роҳхатҳо, борхатҳои молӣ-нақлиётӣ (барои автомашинаҳои боркаш) тасдиқ шуда буд.
Зикр гардид, ки санади мазкур барои иҷрои супориши ҳукумат дар бораи роҳандозии низоми ягонаи нишондиҳандаи омории фаъолияти нақлиёт таҳия ва тасдиқ шудааст.
– Низоми мазкур барои баҳисобгирӣ ва назорати кори нақлиёту ронанда зарур аст. Мақомоти давлатӣ – Муассисаи давлатии “Нақлиёти автомобилӣ ва хизматрасонии логистикӣ” ва Агентии омор дар бораи ҳамлу нақли бору мусофирон, иҷрои кору хизматрасониҳо, пешрафти кори нақлиёт, хароҷоти сӯзишворӣ маълумоти оморӣ мегиранд, – гуфт муовини директори МД “Нақлиёти автомобилӣ ва хизматрасонии логистикӣ”-и Вазорати нақлиёти ҶТ Султонмурод Аҳмадов.
ИЗОБРАЖЕНИЕ Ин роҳхат аст. Дар он ягон сатҳи ҳимоя мавҷуд нест.
Мувофиқи Дастур, мавҷуд будани роҳхат ва борхат барои ҳамаи муассиса ва ташкилоту корхонаҳо, ки дар тавозуни худ нақлиёти автомобилӣ доранд ё автомобили иҷорагирифтаро истифода мекунанд, ҳатмист.
Ба истилоҳи дигар, қайд мекунад Аҳмедов, тамоми шахсони ҳуқуқӣ, ки ба кашонидани бору мусофирон, ҳамчунин дигар кору хизматрасониҳо бо истифода аз нақиёти автомобилӣ машғуланд, бояд роҳхат ё борхат дошта бошанд.
Аз рӯйи қонунгузорӣ, шахсони воқеӣ ба пешниҳоди чунин хизматрасониҳо дар ҷумҳурӣ ҳуқуқ надоранд. Ба гунаи мисол, барои гирифтани иҷозатнома ҷиҳати машғул шудан ба мусофиркашонӣ, шахсони воқеӣ бояд узви ин ё он корхона бошанд.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
