Дар доираи сафари расмӣ ба Фаронса раисҷумҳури Тоҷикистон Эмомалӣ Раҳмон дар шаҳри Порис бо Шоҳзода Карим Оғохони IV мулоқот кард.
Тибқи иттилои хадамоти матбуоти сарвари давлат, дар ҷараёни мулоқот масоили ҳамкории Тоҷикистон бо “Ташкилоти Оғохон оид ба рушд” баррасӣ шуд.
Гуфта мешавад, Эмомалӣ Раҳмон аз сатҳу муҳтавои ҳамкории воқеии миёни Тоҷикистон ва ташкилотҳои шабакавии Хазинаи Оғохон оид ба рушд изҳори қаноатмандӣ кард.
Зимнан омодагии ҷонибҳо баҳри рушду густариши минбаъдаи робитаҳо, татбиқи лоиҳаҳо, ҳамкорӣ дар соҳаҳои иқтисодиёт, кишоварзӣ, сохтмон, рушди деҳот, маорифу тандурустӣ ва фарҳанг, ҳифзи муҳити зист ва андешидани тадбирҳо дар самти рафъи оқибатҳои офатҳои табиӣ изҳор шуд.
Дар ҷараёни мулоқот ҳамчунин масоили робитаҳои дуҷониба дар самти татбиқи барномаҳои давлатию стратегӣ, ба монанди расидан ба истиқлоли комили энергетикӣ, раҳоӣ аз бунбасти коммуникатсионӣ, сохтмони пулҳо ва таъсиси бозорҳои байнимарзӣ дар манотиқи наздисарҳадии Тоҷикистон бо Афғонистон, саҳми Донишгоҳи Осиёи Марказӣ дар шаҳри Хоруғ барои рушди соҳаи маориф баррасӣ гардид.
Зикр мешавад, ки Эмомалӣ Раҳмон дар шаҳри Порис ҳамчунин бо намояндагони доираҳои илму фарҳанг ва ҳунари тоҷик дар Фаронса мулоқот кард.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
