Бақияи қарзи андоз дар вилояти Хатлон ба санаи 1-уми ноябр 173 миллион сомониро ташкил дода, нисбат ба аввали сол 9 миллион сомонӣ кам шудааст.
Тавре аз Раёсати нозироти андоз дар вилояти Хатлон ба Asia-Plus хабар доданд, бақияи қарзи андоз бештар дар шаҳру ноҳияҳои Кӯлоб (19,3 млн сомонӣ), Вахш (12,5 млн сомонӣ), Кӯшониён (20,2 млн сомонӣ) ва Фархор (10 млн сомонӣ) мебошад.
“Агар қарзҳоро ба соҳаҳо тақсим кунем, бештари он ба соҳаи кишоварзӣ – 40,4 млн сомонӣ ё 23,2% аз ҳаҷми умумии қарзҳо ва саноат – 14,3 млн сомонӣ ё 8,2% рост меояд”, – иброз дошт манбаъ.
Ба гуфтаи ӯ, нақшаи қисми даромади буҷети вилоят дар 10 моҳи соли равон бо назардошти андози иҷтимоӣ дар ҳаҷми 1,2 миллиард сомонӣ ё ба андозаи 99,2% иҷро шудааст. Бинобар иҷро нашудани нақша ба буҷет 9,4 миллион сомонӣ ворид нашудааст.
“Дар вилоят 13 шаҳру ноҳияҳо дар даҳ моҳи соли равон нақшаи қисми даромади андозро иҷро накардаанд. Аз ҷумла, Бохтар – 2,5 млн сомонӣ, Левакант – 748 ҳазор сомонӣ, Кӯшониён – 530 ҳазор сомонӣ, Вахш – 440 ҳазор сомонӣ, Хуросон – 1,1 млн сомонӣ, Қубодиён – 3,2 миллион сомонӣ, Абдураҳмони Ҷомӣ – 8,9 млн сомонӣ, Ҷайҳун – 2,1 млн сомонӣ, Панҷ – 4,3 млн сомонӣ, Шаҳритус – 568 ҳазор сомонӣ, Ёвон – 6,6 млн сомонӣ, Ҳамадонӣ – 1,8 млн сомонӣ ва Фархор – 1,9 ҳазор сомонӣ аз нақша кам ҷамъоварӣ кардаанд”, – гуфт манбаъ.
Вай афзуд, ки аз ҳама бештар мушкили ҷамъоварии маблағҳои андоз дар ноҳияҳои Абдураҳмони Ҷомӣ ва Панҷ аст, ки тайи чанд моҳи охир наметавонанд нақшаи қисми даромадашонро иҷро кунанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
