Палатаи поёнии парлумони Тоҷикистон имрӯз тағйироти аз ҷониби ҳукумат пешниҳодшударо ба қонун «Дар бораи тартиб ва шароити дар ҳабс нигоҳ доштани гумонбаршуда, айбдоршаванда ва судшаванда» маъқул шуморид.
Минбаъд дар як ҳуҷраи боздоштгоҳҳои муваққатӣ ва тафтишотӣ нигоҳ доштани ноболиғон ва калонсолон, ки дар содир кардани ҷиноятҳо гумонбар дониста шудаанд, манъ мешавад.
Дар ҷаласаи имрӯзаи палатаи поёнии парлумон вакил Мавлуда Мирзозода изҳор дошт, ки дар тағйирот ҳамчунин пешбинӣ шудааст, агар нисбат ба ноболиғи боздоштшуда аз шиканҷа истифода шуда бошад, ӯ метавонад ба роҳбарияти боздоштгоҳи муваққатӣ ё тафтишотӣ дар ин бора шикоят кунад.
“Роҳбарияти мақомоти ҳифзи ҳуқуқ уҳдадор аст, ки таъҷилан барои азназаргузаронии ноболиғ ташхиси мустақили тиббӣ ташкил кунад. Барои баргузории он ҳадди ақал бояд се коршиноси мустақил ҷалб шаванд”, – қайд кард Мирзозода.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
