Воридшавии сармоягузории мустақими хориҷӣ аз 8,8% нисбат ба ММД дар нимсолаи 2018 то 6,7% тӯли 6 моҳи соли ҷорӣ коҳиш ёфтааст.
Дар ин бора гузориши нави Бонки ҷаҳонӣ дар бораи иқтисоди Тоҷикистон маълумот медиҳад.
“Сатҳи ҷалби сармоягзориҳо барои давлате, ки муддати 10 соли наздик ба кишвари дорои саноати рушдкарда табдил ёфтанист, хеле кам аст”, – чунин мешуморад сариқтисодчии намояндагии Бонки ҷаҳонӣ дар Душанбе Гоар Гулюмян.
Дар гузориш таъкид мешавад, ки Чин бо 75%-и ҳисса дар ҳаҷми умумии сармоягузории мустақими хориҷӣ сарчашмаи бузургтарини сармоягузории мустақим ба Тоҷикистон боқӣ мемонад.
Гуфта мешавад, сармоягузории Чин асосан дар соҳаи саноати истихроҷи тилло бештар мушоҳида мешавад.
Тибқи маълумоти Кумитаи давлатии сармоягузорӣ ва идораи амволи давлатии ҶТ, ҳаҷми умумии сармоягузории мустақими Тоҷикистон тайи дувоздаҳ соли охир 4 млрд. долларро ташкил медиҳад.
Аз ҷумла, соли гузашта ба маблағи 327 млн. доллар чунин сармоягузориҳо ҷалб шудааст, ки дар муқоиса бо соли 2017 ба миқдори 28 млн. доллар зиёдтар мебошад.
Бино ба маълуомти Бонки ҷаҳонӣ, 61% аз ҳаҷми умумии сармоягузориҳо дар соли 2018 ба соҳаи саноати истихроҷи кӯҳӣ рост меояд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
