Корхонаи тоҷикию-туркии Akia Avesto Automotive Industry соли равон 128 адад автобусҳоро васлу насб карда, ба фурӯш гузошт.
Тавре Вазорати саноат ва технолгияҳои нави ҶТ хабар медиҳад, моҳи ноябр 23 адад ва давоми 11 моҳи соли ҷорӣ 128 адад автобус васлу насб ва фурӯхта шудааст.
Гуфта мешавад, аз оғози ба истифода додани корхона дар соли гузашта, дар маҷмӯъ 162 адад автобуси Akia истеҳсол ва ба истифода дода шудааст.
Бино ба маълумоти Вазорат, айни замон арзиши як автобуси «Akia»-и васлу насби Тоҷикистон 132 ҳазор евро мебошад.
Дар бораи ба куҷову ба киҳо фурӯхта шудани мусофирбарҳо маълумот дода намешавад.
Ба ҷамъу васли онҳо дар Душанбе зиёда аз 40 нафар машғуланд. Дар назар аст, ки баъд аз пурра ба истифода додани корхона, шумори коргарон то 200 нафар меафзояд.
Ширкати муштараки Тоҷикистону Туркия Akia Avesto Automotive Industry моҳи январи соли 2018 таъсис шудааст. Он мувофиқи созишномаи сармоягузорӣ байни ҳукумати Тоҷикистон, ҶДММ “Авесто Групп” ва ширкати туркии Ulasim IC YE DIS TICARET Anonim Sirketi амал мекунад.
AKIA AVESTO нахустин ва ягона ширкат дар Тоҷикистон аст, ки мутобиқи меъёрҳои байнулмилалӣ автобус истеҳсол мекунад.
Иқтидори корхона истеҳсоли 300 адад мусофирбар дар як сол мебошад. Ширкат 5 навъи автобусҳои дохилишаҳрӣ ва байнишаҳрӣ истеҳсол мекунад.
Қаблан шаҳрдории Душанбе хабар дода буд, ки то охири сол аз КМ "Akia Avesto Automotive Industry" 100 адад автобуси навъи «AKIA» мехарад.
Автобусҳои «AKIA» ба меъёрҳои байнулмилалии «Евро-5» мутобиқ буда, бо муҳаррикҳои ширкати маъруфи «Мерседес Бенс» ва ширкати олмонии «Zahnrad Fabrik» муҷаҳҳазанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
