Раиси шаҳри Душанбе Рустами Эмомалӣ ба ҳокими шаҳри Тошканд Ҷаҳонгир Ортиҷхоҷаев дар робита ба марги одамон бар асари лағзиши замин барқияи таслият ирсол кард.
Тавре дафтари матбуоти шаҳрдории Душанбе хабар медиҳад, дар барқияи Рустами Эмомалӣ қайд мешавад, ки “хабари лағзиши замин дар майдони сохтмонии хатти метрои Юнусободи шаҳри Тошканд, ки боиси ба ҳалокат расидани шаҳрвандон гардида, харобиҳои калонро ба бор овард, моро хеле андуҳгин кард”.
“Итминони комил дорем, ки тадбирҳои аз ҷониби ҳокимияти бародаршаҳри Тошканд андешидашаванда ба ҳарчи зудтар бартараф кардани оқибатҳои ин садама мусоидат хоҳад кард”, – омадааст дар барқия.
ИЗОБРАЖЕНИЕ
Дар фарҷом аз номи шаҳрдории Душанбе ба пайвандону наздикони қурбониён ҳамдардиву таслияти амиқ изҳор шуда, ба ҳамаи осебдидагон шифои комил хоста шудааст.
Ёдрас мекунем, ки рӯзи 18-уми декабр бар асари лағзиши замин дар майдони сохтмонии хатти метрои Юнусободи шаҳри Тошканд 6 нафар коргарон ҳалок шуданд. Корҳои ҷустуҷӯ ва наҷот ба итмом расида, ҷасадҳои ҳамаи фавтидагон дарёфт шуданд.
Бо супориши комиссияи ҳукумат ба ҳар кадоме аз оилаҳои фавтидагон 100 млн. сӯм дода шуда, дар баргузории маъракаҳои гӯручӯб ва азо ба онҳо кумак карда мешавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
