Кормандони милитсияи пойтахт як ҷавонро барои мардумфиребӣ дастгир кардаанд, ки худро маъюб вонамуд карда, аз ронандагону раҳгузарон талбандагӣ мекард. Ҳамчунин якчанд донишҷӯ барои муомилоти ғайриқонунии маводи тарфгарӣ боздошт шудаанд.
Ба иттилои Раёсати ВКД дар шаҳри Душанбе, ин ҷавон Алихон Ҳайитови 22-сола, истиқоматкунандаи ноҳияи Рӯдакӣ буда, бо нишон додани ҳолати ҳузнангезу маъюбии худ ба роҳи мошингузар баромада, вазъияти хатарнокро ба вуҷуд меоварду машғули ин кор мешуд.
Чунончи аз тамошои видео бармеояд, номбурда то ба дараҷае худро моҳирона маъюб нишон медиҳад, ки дар дили ронандагону роҳгузарон эҳсоси раҳму шафқатро ба вуҷуд меорад ва онҳо ба ӯ дасти кумак дароз мекунанд.
Қаблан ҳам аз ҷониби мақомоти ҳифзи тартиботи ҷамъиятии пойтахт як нафар чунин мардумфиребро дастгир карда буданд, ки ӯ низ дорои ҷисми солиму бозӯи нерӯманд буд, вале худро маъюб вонамуд карда, бо барангехтани раҳму шафқат ва эҳсоси инсондустӣ дар дили шаҳрвандон маблағ ҷамъоварӣ мекард. Дар нисбати ӯ чораҳои таъсиррасони қонунӣ андешида шуданд.
Ҳамзамон кормандони милитсияи шаҳри Душанбе вобаста ба пешгирии муомилоту истифодаи маводи тарфгарӣ якчанд нафарони машғули ин амалро ба ҷавобгарӣ кашидаанд.
Рӯзи 24-уми декабр зимни гузаронидани чорабиниҳои фаврӣ-ҷустуҷӯӣ шаҳрвандон Ҳоҷибобо Шарифов, соли таваллудаш 1998, донишҷӯйи соли 3-юми Донишгоҳи кишоварзии Тоҷикистон, Шероз Холматов, соли таваллудаш 1999, донишҷӯйи соли 3-юми Донишгоҳи техникии Тоҷикистон ба номи М.Осимӣ, Шералӣ Холматов, соли таваллудаш 2000, донишҷӯйи соли 2-юми ҳамин донишгоҳ ва Далер Зокиров, соли таваллудаш 1999, донишҷӯйи соли 3-юми донишгоҳи мазкур дастгир шуданд. Онҳо бо мақсади фурӯш миқдори зиёди маводи пиротехникиро аз вилояти Суғд ба шаҳри Душанбе интиқол додаанд.
Зимни кофтуков аз номбурдагон 4 қуттӣ бо миқдори умумии 30 ҳазор дона маводи тарфгарӣ бо навиштаҷоти «Трения» дарёфту мусодира карда шуд.
Нисбат ба онҳо тибқи талаботи моддаи 199 иловаи 1 КҶ ҶТ (Муомилоти ғайриқонунии маводи тарфгарӣ (пиротехникӣ) парвандаи ҷиноятӣ оғоз карда шудааст. Маврид ба зикр аст, ки мувофиқи талаботи моддаи мазкур ба ҳудуди Тоҷикистон ворид намудан, истеҳсол кардан, нигоҳ доштан, фурӯхтан, ба соҳибияти каси дигар додан ва истифода бурдани маводи тарфгарӣ манъ буда, нисбат ба чунин шаҳрвандони ҷарима ба андозаи аз 100 то 500 нишондиҳанда барои ҳисобҳо ё маҳрум сохтан аз озодӣ ба муҳлати то 2 сол ҷазо пешбинӣ шудааст.
Аз аввали моҳи декабр то имрӯз зиёда аз 400 ҳазор дона маводи гуногуни тарфгарӣ мусодира шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
