Вакилони палатаи поёнии парлумони Тоҷикистон имсол барои шарҳу тавзеҳи бандҳои паёми раисҷумҳур аз 26-уми декабри соли гузашта ба минтақаҳо намераванд.
Қаблан чунин таҷриба роиҷ буд: баъд аз чанд рӯзи ироаи паёми сарвари давлат вакилон барои тавзеҳи он ба минтақаҳо сафар мекарданд.
Ин навгонӣ ба он вобаста аст, ки ваколати намояндагони мардумӣ дар палатаи поёнии парлумон дар арафаи анҷомёбист ва аксари онҳо ба номзадии вакилӣ пешбарӣ намешаванд. Дар ин бора ба “Азия-Плюс” як манбаъ аз Маҷлиси намояндагони Маҷлиси Олии Тоҷикистон (МНМО ҶТ) хабар дод.
Дар ҳамин ҳол, вакили МНМО ҶТ даъвати ҳозира, раиси Ҳизби демократи Тоҷикистон Саидҷаъфар Усмонзода, ки аз рӯйхати ин ҳизб дар ҳавзаи умумиҷумҳуриявии интихоботӣ номзад ба вакилӣ пешбарӣ мешавад, ба “Азия-Плюс” изҳор дошт, дар ҷараёни маъракаи пеш аз интихоботии худ ва вохӯриҳо бо интихобкунандагон ба шарҳи паёми президент таваҷҷуҳи хос зоҳир хоҳад кард.
Вакилон Дилрабо Мансурӣ, Фирӯза Шарифӣ, Насиба Содиқова ва Абдураҳим Холиқзода аз Ҳизби халқии демократии Тоҷикистон, Рустам Латифзода аз Ҳизби аграрӣ, Саидҷаъфар Усмонзода аз Ҳизби демократ, Абдуҳалим Ғаффоров аз Ҳизби сотсиалистӣ ва Рустам Қудратов аз Ҳизби ислоҳоти иқтисодӣ ният доранд, ки аз рӯйи рӯйхати аҳзоби сиёсӣ дар ҳавзаи умумиҷумҳуриявии интихоботӣ такроран курсиҳои вакилиро ба даст оранд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
