Соли гузашта содироти маҳсулоти хӯрокворӣ аз Тоҷикистон ба кишварҳои гуногун густариш ёфт.
Тавре Вазорати саноат ва технологияҳои нави ҶТ хабар медиҳад, соли 2019 бори нахуст дар таърихи саноати хӯроквории кишвар маҳсулоти консервашудаи «Пиёзи анзур», «Ғураоб» ба ИМА, хушкмеваи «Тут» ба Туркия, нӯшобаи «Хуч» ва афшураи «Зардолу» ба Литва, оби маъдании «Хаватаг», оби ошомидании «Оби Зулол» ва «Сиёма» ба Озарбойҷон ва Амороти Муттаҳидаи Араб содирот карда шуд.
Гуфта мешавад, соли гузашта дар муқоиса бо соли 2018 ҳаҷми содироти орд аз Тоҷикистон 3 баробар (то 3,1 ҳазор тонна), нӯшокиҳои ғайриспиртӣ – 2,5 баробар (то 4,4 ҳазор тонна), шарбати меваю сабзавот – 95% (то 140 тонна), намак – 85% (то 2,3 ҳазор тонна) ва маснуоти қаннодӣ – 30% (то 484 ҳазор тонна) афзуд.
Тибқи маълумоти Вазорати саноат ва технологияҳои нав, соли 2019 корхонаҳои саноати хӯроквории ҷумҳурӣ ба маблағи беш аз 5,3 млрд. сомонӣ (545 млн. доллар) маҳсулот истеҳсол кардаанд, ки нисбат ба соли 2018 ба миқдори 9,2% ё худ 452 млн. сомонӣ зиёдтар аст.
Соли гузашта ҳиссаи саноати хӯрокворӣ дар маҷмӯи маҳсулоти саноатии кишвар – 19,5% ва дар саноати коркард – 33,7%-ро ташкил дод.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 45 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
