Прокурори гарнизони Хатлон Наврӯз Тоирзода мегӯяд, хизматчии қисми низомии Қӯшунҳои сарҳадии КДАМ Иброҳим Ниёзов худро аз ошёнаи дуюми беморхона ба замин партофтааст.
Дар ин бора Тоирзода рӯзи 29-уми январ зимни нишасти матбуотии прокуратураи вилояти Хатлон изҳор дошт.
“Иброҳим Ниёзов рӯзи 13-уми ноябри соли 2019 аз комиcсариати ҳарбии ноҳияи Шаҳристон даъват шуда, мувофиқи тақсимот ба қисми низомии Қӯшунҳои сарҳадии КДАМ ҶТ, мустақар дар ноҳияи Панҷ сафарбар карда мешавад. Дар қисми ҳарбӣ номбурда аз ҳуш меравад ва ӯро дар беморхонаи марказии ноҳияи Панҷ бистарӣ мекунанд. Вай ҳангоми табобат худро аз ошёнаи дуюми беморхона ба замин мепартояд, ки дар натиҷа ҷароҳати ҷисмонӣ мебардорад. Вобаста ба ин ҳолат шоҳидҳо ҳастанд”, – гуфт прокурори гарнизони Хатлон.
Вай афзуд, ки дар рафти санҷиши ин ҳодиса ягон ҳолати муносибати ғайриоинномавӣ нисбат ба ин сарбоз ошкор нашудаст.
“Дар рафти санҷиш ҳолати гирифтории Иброҳим Ниёзов ба бемории асаб ошкор карда шудааст. Вобаста ба он ки ҳангоми даъват номбурда бемор буд ё не ва то куҷо ба сафи Қувваҳои мусаллаҳ қонунӣ даъват шудааст, мо маводро аз рӯйи тобеъият ба Сарпрокуратураи ҳарбии ҶТ фиристодем. Зеро ӯ аз гарнизони мо даъват нашудааст ва аз рӯйи тобеъият мо ҳуқуқи санҷиши ин ҳолатро надорем”, – қайд кард Тоирзода.
Дар ҳамин ҳол, модари Иброҳим – Ҳалима Мирова ба Радиои “Озодӣ” гуфтааст, писарашро дар артиш ба ҳаде азият кардаанд, ки тавони суҳбат надорад. “Миёни бачам задагӣ, гуфтанд ғалтидагӣ аст, ба ман қоил нашуданд”, – афзудааст ӯ.
Радиои Озодӣ навиштааст, ки Иброҳим Ниёзов соли гузашта Донишкадаи давлатии санъатро дар Душанбе хатм карда, дар мавсими даъвати тирамоҳӣ, ба гуфтаи наздиконаш, аз тариқи “облава” ба хизмат бурда шуд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
