Вазири корҳои хориҷии Тоҷикистон Сироҷиддин Муҳриддин зимни нишасти матбуотӣ изҳор дошт, ки масъалаи интиқоли борҳои Тоҷикистон тариқи қаламрави Туркманистон ба наздикӣ ҳалли худро меёбад.
Ба гуфтаи ӯ, ин масъала ба робитаҳои мутақобилаи ду кишвар вобаста нест, зеро “муносибатҳои сиёсии мо бо Туркманистон хеле хубанд”.
“Мушкили транзити борҳои мо тариқи Туркманистон ба тадбирҳои амниятӣ дар дохили ин кишвар марбутанд. Ғайр аз ин, Туркманистон тӯли чандин сол кӯпруки байни ин кишвар ва Эронро, ки тавассути он мошинҳои боркаши мо мегузаштанд, таъмир карданист”, – хабар дод вазири корҳои хориҷии Тоҷикистон.
Ӯ қайд кард, ки пас аз мулоқоти сарони кишварҳои Тоҷикистону Туркманистон моҳи октябри соли гузашта дар доираи ҳамоиши ИДМ, ба Вазоратҳои корҳои хориҷии ду кишвар дастур дода шуд, ҳамаи масъалаҳоро дар ин самт ҳал кунанд.
“Мо лоиҳаи харитаи роҳро аз ҷониби Туркманистон гирифтем ва онро айни замон баррасӣ дорем. Ба наздикӣ ба он посух дода, пешниҳодоти худро ирсол мебдорем. Муносибатҳо дар ҳамаи сатҳҳо хуб мешавад”, – афзуд вазир.
Ёдрас мекунем, ки аввали моҳи феврали соли гузашта Туркманистон равуои нақлиётро бо бору маҳсулоти Тоҷикистон тариқи қаламраваш манъ кард. То ин дам ҳукумати Туркманистон транзити бору маҳсулоти Тоҷикистонро моҳи сентябри соли 2018 манъ карда буд, лекин он вақт ин мушкил дар муддати як моҳ ҳал шуд.
Қаблан дар Маркази тадқиқоти стратегии ҷумҳурӣ қайд карданд, ки “Туркманистон манъи транзити борҳои Тоҷикистонро ба масъалаи амният марбут медонад”. Зикр гардид, ки Марказ барои манъи транзити бору маҳсулот тариқи қаламрави Туркманистон ҳеҷ сабаберо намебинад.
Охири моҳи январ вазири нақлиёти Тоҷикистон Худоёр Худоёрзода зимни нишасти матбуотӣ дар ин робита изҳор дошт, ки мушкилоти мазкур ҳалношуда боқӣ монда, сабабаш номаълум аст.
“Сарфи назар аз муроҷиатҳои чандинкаратаи Тоҷикистон, ин мушкилот то ҳол роҳи ҳалли худро намеёбад. Вақте бо ҳамтоёни туркмани худ ин масъаларо баррасӣ мекунанд, онҳо мегӯянд, ки сабабашро намедонанд”, – гуфта буд ӯ.
Вазир қайд кард, ки роҳҳои Туркманистон натанҳо барои мошинҳои боркаши тоҷик, балки ба нақлиёти кишварҳои дигар, ки ба Тоҷикистон бору маҳсулот меоранд, низ баста боқӣ мемонанд.
“Барои баромадан ба Ховари Миёна бидуни убури қаламрави Туркманистон мо роҳҳои алтернативӣ пайдо кардем: тариқи Ӯзбекистон, Қазоқистон, баҳри Каспий, Озарбойҷон ва минбаъд то Эрону Туркия. Дар муқоиса бо роҳи Туркманистон ин хатсайр то Эрон 1 ҳазор километр дарозтар ва то Туркия баръакс, 434 километр камтар аст”, – изҳор дошта буд вазир.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
