Зимни брифинг дар Женева сарвари кулли Созмони ҷаҳонии тандурустӣ (СҶТ) Тедрос Адханом Гебрейсус изҳор доштааст, ки хуруҷи коронавирус алҳол пандемия (бемории ҳамагир) нест, аммо ба он табдил ёфтанаш “имкон дорад”. Дар ин бора Коммерсант хабар медиҳад.
“Мо бояд ба пешгирии паҳншавии он таваҷҷуҳ зоҳир карда, тамоми имконотро истифода барем, то ки ба пандемияи имконпазир омода бошем”, – афзудааст Гебрейсус.
Ёдрас мекунем, ки аввалин ҳолатҳои сирояти коронавируси COVID-19 моҳи декабри соли 2019 дар шаҳри Ухани Чин ба қайд гирифта шуданд.
Тибқи шарҳи Созмони ҷаҳонии тандурустӣ, пандемия паҳншавии бемории нав дар миқёси ҷаҳонӣ мебошад.
Тибқи маълумоти Созмон, дар берун аз ҳудуди Чин аллакай дар 28 кишвар 2074 ҳолати сирояти COVID-19 ва 23 ҳолати фавт ба қайд гирифта шудааст.
Дар кишварҳои Итолиё, Эрон ва Кореяи Ҷанубӣ паҳншавии нисбатан зиёди коронавирус мушоҳида шудааст.
Тибқи маълумоти ахир, дар Чин бар асари коронавирус аз 77 ҳазор ҳолати тасдиқшудаи сироятёбӣ 2 592 нафар вафот карданд.
Тавре нашрияи South China Morning Post менависад, то рӯзи 24-уми феврал теъдоди сироятёфтагони коронавирус дар саросари ҷаҳон 79,4 ҳазор нафарро ташкил медиҳад.
Дар ҷаҳон (ба ҷуз ҳудуди қоравии Чин) шумори сироятёфтагон дар як шабонарӯз 416 нафар зиёд шуд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
