Дар ноҳияи Ҷайҳун 3 ноболиғ аз як хонавода баъд аз истеъмоли занбурӯғ заҳролуд шуда, дар беморхона фавтиданд.
Тавре ба “Азия-Плюс” аз Беморхонаи марказии ноҳияи Ҷайҳун хабар доданд, рӯзи 14-уми апрел чаҳор ноболиғ – Нигорамоҳ Ҳомидоваи 10-сола, Нозанини 7-сола, Басонати 6-сола ва Рустамҷони 2-сола дар шуъбаи эҳёгарии беморхонаи мазкур бо аломатҳои дилбеҳузурӣ бистарӣ карда шуданд.
“Аз рӯйи нақли модари кӯдакон, онҳо рӯзи 14-уми апрел аз саҳро як коса занбурӯғ чида овардаанд ва аз ӯ хоҳиш кардаанд, ки барояшон пухта бидиҳад. Модар барояшон занбурӯғро пухта додааст. Баъд аз истеъмоли он вазъи саломатии кӯдакон бад шуда, онҳоро ба беморхона интиқол додаанд”, – гуфт манбаъ.
Ба қавли ӯ, пизишкон барои наҷоти кӯдакон чора андешиданд, вале 17-уми апрел Нигорамоҳ, 18-уми апрел Рустамҷон ва 19-уми апрел Нозанин вафот карданд.
Табибон ҳолати Басонат Ҳомидоваро айни замон муътадил арзёбӣ мекунанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
