Шумори гирифторони “илтиҳоби шуш” дар вилояти Хатлон ба 419 нафар расида, 19 кас аз ин беморӣ вафот карданд.
Дар ин хусус ба “Азия-Плюс” аз маркази назорати давлатии санитарию эпидемиологии вилояти Хатлон хабар доданд.
“Шумори беморон аз 1-уми май афзудааст. Ҳамарӯза тақрибан 60-70 кас бистарӣ мешаванд. Аз ҷумла, рӯзи 3-юми май 65 нафар бо “илтиҳоби шуш” ва бемории шадиди роҳҳои нафас дар бемористон хобонида шуда, 3 кас фавтиданд”, – изҳор дошт манбаъ.
“Вазъият дар ноҳияҳои Данғара, Шаҳритус ва Кӯшониён вазнинтар аст. Масалан, дар ноҳияи Данғара – 60 нафар, Кӯшониён – 54 кас ва Шаҳритус – 53 нафар бистарӣ шудаанд”, – афзуд ӯ.
Қобили зикр аст, ки айни замон дар Беморхонаи клиникии вилоятии ба номи Бӯрӣ Воҳидови шаҳри Бохтар 42 кас бистарӣ буда, аз ин теъдод вазъи 8 нафар вазнин арзёбӣ мешавад.
Як манбаъ аз ин беморхона ба “Азия-Плюс” гуфт, ки дар байни беморон кормандони соҳаи тандурустӣ низ ҳастанд. Аз ҷумла, сардори Раёсати тандурустии вилояти Хатлон Мирзоалӣ Раҷабзода 2 рӯз инҷониб бо таби баланд дар ин беморхона бистарӣ шудааст.
Тавре қаблан хабар дода будем, муовини раиси ноҳияи Шаҳритус Меҳринисо Раҷабзода бо ҳарорати баланд бистарии дармонгоҳ шуд. Ба гуфтаи як манбаъ, аз бемории “илтиҳоби шуш” ду корманди мақомоти иҷроияи ҳокимияти давлатии ноҳияи Шаҳритус – сармуҳосиб Эгам Исоев ва мутахассиси шуъбаи иқтисод Сайфиддин Садриддинзода вафот кардаанд.
Ин дар ҳолест, ки раиси вилояти Хатлон Қурбон Ҳакимзода ба роҳбарони шаҳру ноҳияҳо ва ташкилоту идораҳо супориш додааст, баҳри пешгирию паҳншавии COVID-19 чораҳои зарурӣ андешанд. Ҳамчунин корҳои безараргардонӣ дар ҳудуди вилоят афзоиш дода шаванд.
Раиси вилоят маоши якмоҳаи худро ба хазинаи мубориза бо COVID-19 гузаронидааст. Бино ба иттилоои маркази матбуоти раиси вилояти Хатлон, ҳамчунин кормандони мақомоти иҷроияи ҳокимияти давлатии вилоят низ як қисми маоши худро ба ин хазина гузарониданд.
Қурбон Ҳакимзода дастур додааст, ки ба кормандони соҳаи тандурустӣ, аз ҷумла, ба табибони маълумоти олидор 500 сомонӣ, ба табибони маълумоти миёна 400 сомонӣ ва кормандони техникиӣ 300 сомонӣ кумакпулӣ пардохт шавад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
