Дар давраи пандемия дар Вилояти Мухтори Кӯҳистони Бадахшон 22 нафари шахсони синни 55 ва аз он болотар фавтиданд. Дар ин бора ба “Азия-Плюс” котиби матбуотии раиси вилоят Ғолиб Ниятбеков хабар дод.
Ба гуфтаи ӯ, дар ҷаласаи навбатии ситод оид ба пешгирии паҳншавии коронавирус раиси ВМКБ Ёдгор Файзов чунин гуфтааст.
“22 нафаре, ки дигар бемориҳои иловагии кӯҳна доштанд, аз коронавирус дар минтақа вафот карданд. Аз ин шумор 14 нафар дар беморхонаи вилоятӣ ва 8 кас дар дигар беморхонаҳои ноҳияҳои вилоят фавтиданд. Сатҳи умумии фавт дар ВМКБ 1,5%-ро ташкил дод”, – қайд шудааст дар ҷаласа.
ИЗОБРАЖЕНИЕ
Дар ҳамин ҳол, зимни ҷаласа таъкид шудааст, ки рӯзҳои охир шумори сироятёфтагон кам шуда истодааст.
“Агар қаблан дар як рӯз аз 50 то 70 нафар муроҷиат мекарданд, акнун тибқи омори расмӣ, то 7 июн ҳамагӣ 19 нафар бистарӣ шудаанд, ки дар муқоиса бо ҳафтаи гузашта, хеле камтар аст”, – илова кард Ниятбеков.
Бино ба маълумоти расмӣ, дар вилоят 1506 нафар табобат гирифта, 1 ҳазору 132 кас ё худ 75%-ашон пас аз шифоёбӣ рухсатӣ шудаанд.
Дар Помир вазъ хеле бад ё маълумоти оморӣ носаҳеҳ аст?
Тибқи маълумоти расмии Вазорати тандурустӣ, аз оғози пандемия дар кишвар ҳамагӣ 48 нафар аз коронавирус фавтидаанд.
Пас чунин бармеояд, ки қариб нисфи фавтидагон ба ВМКБ рост омада, боқимонда 26 каси дигар байни дигар минтақаҳо тақсим шудаанд!?
Мувофиқи хабар охири Вазорати тандурустии ҷумҳурӣ дар ин хусус, то 8 июн дар мамлакат 1 ҳазору 176 нафар зери назорати табибон қарор дошта, дар як шабонарӯзи охир 90 нафар пас аз шифо ёфтан ба хонаҳояшон рухсат дода шуданд.
Гуфта мешавад, ҳамзамон, то соати 18:00 дақиқаи 8 июн дар кишвар 4 ҳазору 609 нафар бо ташхиси сирояти коронавируси нави КОВИД-19 ошкор гардида, аз ин беморӣ то кунун дар мамлакат 2 ҳазору 763 (60%) нафар шифо ёфтаанд. Ҳамзамон, то санаи зикргардида дар мамлакат аз ин беморӣ 48 нафар фавтидаанд.
Дар ҳамин ҳол, рӯйхати ғайрирасмии фавтидагон аз коронавирус дар торнамои kvtj.info ҳамарӯза навсозӣ ва зиёдтар мешавад.
То имрӯз дар рӯйхати сомона 426 нафар зикр шудаанд. Акнун ба ғайр аз маълумот дар бораи шахсият, синнусол, ҷойи кор, макони зист, рӯзи марги ин одамон ва манбае, ки аз фавти онҳо хабар додааст, сатре илова шудааст, ки дар он гуфта мешавад, ин далели тасдиқшуда мебошад ё он мавриди санҷиш қарор дорад.
Аксари ному насабҳо аз ҷониби дастандаркорон (модераторон) тасдиқ карда шудааст.
Дар рӯйхат бо ранги гулобӣ ному насаби 64 нафар кормандони тиббии аз COVID-19 фавтида низ оварда шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
