Сокини 42-солаи Ҳисор ба номуси духтари 12-сола таҷовуз кард: 2 моҳ пеш ӯ кӯдак таваллуд кард, хабар доданд ба “Азия-Плюс” аз ВКД Тоҷикистон. Зикр шуд, ки кормандони милитсия далели таҷовуз ба номусро ошкор намуда, айни замон прокуратураи шаҳри Ҳисор ин парвандаро тафтиш мекунад.
Дар бораи ин ҳодисаи гӯношунид дирӯз, 17 июн раиси Ҳизби сотсиал-демократии Тоҷикистон Раҳматилло Зойиров дар саҳифааш дар Facebook хабар дод.
Дар номаи кушод ба унвони Прокурори генералӣ ва вазири корҳои дохилии Тоҷикистон ӯ дар бораи таҷовуз ба номуси духтари 12-сола дар ҷамоати деҳоти Сомон, участкаи Кӯчабоғ дар Ҳисор аз ҷониби ҳамсояаш иттилоъ медиҳад:
“Шаҳрванди 42-сола Ҳ.А. соли гузашта дар говхона ба номуси духтари 12-сола таҷовуз кард. Ӯ бо таҳдид ва истифода аз ҳолати нотавонии духтар ин корро чандин маротиба такрор кардааст”.
“Вақте ки волидони духтар аз ин ҳодиса огоҳ мешаванд, шаҳрванд Ҳ.А. бо роҳи таҳдид онҳоро аз додани ариза бозмедорад. Баъди чанде маълум мешавад, ки духтар ҳомиладор аст. Волидонаш ба прокуратура ва шуъбаи корҳои дохилӣ мераванд, то ки аз болои ҳамсояашон шикоят кунанд, лекин аризаи онҳоро қабул намекунанд. Илова бар ин, айбдоршавандаро фаро гирифта, бо оқибатҳои вазнин таҳдид карданд”, – менависад Зойиров.
Дар идомаи мактуби кушод ӯ қайд мекунад, ки ду моҳ пештар духтар кӯдак таваллуд карда, ҳозир дар Ҳисор болои духтар ва волидони ӯ фишор оварда мешавад, то ки қазия бо роҳи соишта ва бидуни оқибат ҳал шавад.
“Ҳоло духтарак 13-сола ва кӯдак 2-моҳа аст. Ҳолати кӯдак вазнин мебошад. Вазъ бениҳоят мураккаб аст, ки кӯдак метавонад бимиррад ва пас прокурорҳо ва кормандони мақомоти ҳифзи ҳуқуқ ҳамроҳи айбдоршаванда қарор медиҳанд, ки таҷовуз ба номус набуд, вай кӯдакро аз дигар одам бардошт ва ҳоло Ҳ.А.-ро айбдор мекунад”, – зикр мегардад дар мактуб.
ВКД аз қазия огоҳ аст
Дар ВКД Тоҷикистон гуфтаҳои Раҳматилло Зойировро дар бораи аз ҷониби кормандони ппоокуратура ва мақомоти корҳои дохилии Ҳисор рӯйпӯш кардани ҷиноятҳои содиршуда ё беамалӣ, ки агар ҳодиса ба шиносу хешовандон дахл дошта бошад, рад карданд.
“Пас аз маълум шудани ҳомиладории духтар, ӯ иқрор шуд, ки ба номусаш таҷовуз кардаанд. Баъди ин кормадони милитсияи далели таҷовуз ба номусро сабт намуда, айни замон прокуратураи шаҳри Ҳисор ба тафтиши ин ҳодиса машғул аст”, – изҳор доштанд дар ВКД Тоҷикистон.
Дар ҳамин ҳол, дар фарҷоми номаи худ раиси ҲСДТ аз Прокурори генералӣ ва роҳбари ВКД дархост мекунад, ки ин қазияро зери назорат гиранд, то шахсе, ки ҷиняти воқеӣ содир кардааст (якум таҷовуз, дуюм алоқаи ҷинсӣ бо шахси ноболиғ ва сеюм таҳдид ва таъқиби духтар ва падару модари ӯ), аз ҷавобгарӣ дур намонад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
