Соҳибкорони Тоҷикистон, ки пешбурди тиҷоратро тариқи шакли онлайн қабул надоранд, шояд ояндаи наздик фаъолияти худро қатъ кунанд.
Раиси Палатаи савдо ва саноат (ПСС)-и Тоҷикистон Ҷамшед Ҷумъахонзода зимни нишасти матбуотӣ дар ин робита изҳор дошт, ки камбуди онҳо дар қодир набудан ба мутобиқшавӣ ба шароити нав ва боисрор пайгирии шаклу усули пешинаи савдо ифода меёбад.
Пандемияи коронавирус ба фаъолияти ПСС баъзе тағйирот ворид карда, баҳри мусоидат ба ширкатҳои содиркунандаи ватанӣ дар азхудкунии бозорҳои нави фурӯш Палата ҷиҳати гузаронидани тиҷорат ба реҷаи онлайн фаъолона тадбирҳо рӯйи кор мегирад.
“Мутаассифона, аксари тоҷирону ширкатҳо дар бораи афзалият ва суди тиҷорати онлайн тасаввуроти кофӣ надошта, шаклҳои анъанавии пешбурди онро афзалтар медонанд ва бо ин сабаб шояд ба наздикӣ бозори худро аз даст дода, фаъолияташонро қатъ кунанд”, – гуфт Ҷумъахонзода.
Ба гуфтаи ӯ, коҳиши хароҷот барои иҷораи майдони савдо, камшавии шумори ҳайати шахсӣ ва мутаносибан хароҷоти музди меҳнат, тавсеъаи имконоти паҳншавии маълумот дар бораи маҳсулот ва таблиғи он, дарёфти шарикон барои тиҷорати бузургу миёна дар кишварҳои дигар аз ҷумла афзалиятҳои муҳими савдои электронӣ мебошанд.
Барои қафо намондан аз тамоилҳои муосир ва беҳбуди самаранокии фаъолият ҷиҳати кумак ба ширкатҳои содиркунандаи маҳсулоти ватанӣ ва рушди тиҷорат дар Тоҷикистон, Палата ният дорад, ки Шӯрои тиҷорати электронӣ таъсис диҳад. Дар ин Шӯро масоили марбут ба пешбурди тиҷорат бо реҷаи онлайн мавриди баррасӣ ва ҳаллу фасл қарор мегиранд.
Палатаи савдо ва саноати Тоҷикистон намоишгоҳҳои миллиро низ тариқи реҷаи онлайн баргузор карданист.
Масалан, Намоишгоҳ-ярмаркаи байнулмилалии “Тоҷикистон-2020” тирамоҳи соли равон метавонад нахустин чорабинӣ дар шакли онлайн бошад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
