Бонки осиёии рушд (БОР) ба Тоҷикистон ҷудо кардани гранти иловагиро ба маблағи 2,5 млн доллар маъқул донист.
Тавре дар сомонаи Бонк хабар дода мешавад, ин маблағ аз Фонди вокуниш ба офатҳои табиии Осиёву Уқёнуси Ором барои дастгирии минбаъдаи тадбирҳои ҳукумат дар мубориза бо пандемияи коронавирус ҷудо мешавад.
“Бонки осиёии рушд комилан ҷонибдори он аст, ки ба Тоҷикистон дар то ба ҳадди ниҳоӣ паст овардани таъсири пандемия ба солимии одамон ва иқтисоди кишвар кумак кунад”, – гуфтааст намояндаи доимии БОР дар Тоҷикистон Прадип Сривастава.
Гуфта мешавад, гранти мазкур ба Тоҷикистон дар таъҷилан харидории маводу лавозимоти зарурии тиббӣ барои мубориза бо COVID-19 мувофиқи нақшаи миллии вокуниш ёрӣ мерасонад.
“Аз ҳисоби ин грант харидории таҷҳизоти тиббӣ ва дигар чорабиниҳо баҳри кумак ба ҳукумат дар ҳалли таъҷилии мушкили вобаста ба мубориза бо пандемия низ маблағгузорӣ мешаванд”, – гуфтааст Прадип Сривастава.
Грант илова ба кумакҳои зерини пешинаи БОР ба Тоҷикистон дар муқовимат бо COVID-19 мебошад: 50 млн доллар грант барои дастгирии буҷет; 928 ҳазору 200 доллар грант кумаки техникӣ ва 100 ҳазор доллар грант дар доираи лоиҳаи ҳифзи солимии модарону кӯдакон ва харидории маводи тиббӣ.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
