Муаллифи сурди миллии ҷумҳурӣ, Шоири халқии Тоҷикистон Гулназар Келдӣ, ки дар синни 75-солагӣ аз олам даргузашт, рӯзи 13 август дар оромгоҳи Лучоби шаҳри Душанбе ба хок супурда шуд.
Чанд рӯз пеш ӯ ба гумони гирифторӣ ба коронавирус дар яке аз бемористонҳои пойтахт бистарӣ шуда буд.
Дар маросими ба роҳи охират гусел кардани шоири тавоно, ходимони илму фарҳанг, намояндагони ҳукумат, котиби матбуотии президент Абдуфаттоҳ Шарифзода ва дигар шахсони маъруфи кишвар ҳузур доштанд.
Президенти Тоҷикистон Эмомалӣ Раҳмон ба аҳли хонавода ва наздикону пайвандони марҳум ҳамдардии амиқ баён намуд.
Оромгоҳи Лучоб дар қисмати ҷануби боғи ҳамноми он воқеъ аст. Соли 1980 дар қисми ҷанубии боғ мақбараи Шоири халқии Тоҷикистон Мирзо Турсунзода бунёд шуда, аз он замон он макони мақбараи намояндагони шинохтаи илму фарҳанги кишвар маҳсуб меёбад.
Дар ин ҷо оромгоҳи намояндагони саршиноси илму фарҳанги Тоҷикистон – Лоиқ Шералӣ, Фазлиддин Муҳаммадиев, Ҷалол Икромӣ, Тӯҳфа Фозилова, Ғаффор Валаматзода, Малика Собирова, Рауф Баротов, Бозор Собир, Мӯъмин Қаноат ва дигар ходимони маъруфи давлатию сиёсии кишвар ҷойгир аст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
