Хосият, толибаи синфи 10-уми яке аз мактабҳои шаҳри Панҷакент рӯзи 12 сентябр корвони мошинҳои президент Эмомалӣ Раҳмонро зимни сафари кориша ба вилояти Суғд манъ карда, номаашро ба дасти ӯ дод.
Бино ба иттилои Бахши хабарии Осиёи Марказӣ, зоҳиран, аксари онҳое, ки ҳангоми сафари президент ба минтақаҳо бо ӯ сӯҳбат мекунанд, аз пеш омода шудаанд ва хеле кам иттифоқ меафтад, ки як нафар бидуни тавсияи мақомот ба мулоқоти президент роҳ ёбад. Эмомалӣ Раҳмон дар доираи ҷашни 5500-солагии Саразм ба Панҷакент сафар карда буд.
Хосият Олишова, сокини шаҳри Панҷакент субҳи 12-уми сентябр ҳангоме, ки корвони мошинҳои ҳайати давлатӣ бо ҳамроҳии президент Эмомалӣ Раҳмон дар хиёбони Рӯдакии шаҳри Панҷакент ба самти бинои панҷошёнаи “Саразм плаза” ҳаракат мекард, бо садои баланд “президент дар кадом мошин ҳаст” гуфта, худро ба мошинҳои сиёҳшиша наздик мекунад.
Ба гуфтаи шоҳидон, муҳофизони президент пеши роҳи ӯро гирифтанӣ мешаванд, вале президент аз дохили мошин ишора мекунад, ки "монед биёяд". Хосият номаашро ба президент супурда, баъди он ӯро ба ҳукумати шаҳри Панҷакент мебаранд.
Абдуфаттоҳ Шарифзода, сухангӯи президент рӯзи 12-уми сентябр гуфт, воқеан чунин ҳолат пеш омад ва "президент ба ман гуфтанд, ки духтарча ятим будааст, мушкилот доштааст”.
“Ҳоло нома дар дасти президент ҳаст. Вақте вай ба тарафи корвони президент ҳаракат кард, президент мошинро манъ карда, даст аз оинаи мошин берун кард. Даъваташ карданд ва номаашро гирифтанд”, – гуфтааст ӯ.
Мақсуда Аҳророва, директори мактаби рақами 71-и шаҳри Панҷакент, ки Хосият дар он таҳсил мекунад, гуфтааст “бо Хосият ва модараш суҳбат кардам”.
Ӯ гуфтааст, ки Хосият дар номааш хоҳиши манзили зист кардааст, зеро ӯ бо модараш дар иҷора зиндагӣ дошта, падари ин духтар 3 моҳ пеш фавтидааст ва онҳо бесарпаноҳ мондаанд.
"Хосият аз хонандаҳои фаъол аст ва таҳсили хуб дорад", – изҳор доштааст ӯ.
Як намояндаи ҳукумати шаҳри Панҷакент ба шарти наовардани номаш гуфтааст, ки бо ин духтар сӯҳбат кардаанд ва арзи ӯро шунидаанд. Ба ӯ 10 ҳазор сомонӣ (наздики 1 ҳазор доллар) ва равғану шакару орду биринҷ кӯмак кардаанд.
Дар робита ба ҷашни 5500-солагии шаҳраки Саразми бостонӣ Эмомалӣ Раҳмон бо сафари корӣ дар шаҳри Панҷакент қарор дошт. Имрӯз сарвари давлат аз ноҳияи Мастчоҳ боздид мекунад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
