Вазири нақлиёти Тоҷикистон Азим Иброҳим рӯзи 16 сентябри соли равон бо намояндагони Бонки аврупоии таҷдид ва рушд (БАТР) тариқи онлайн (видеоконфронс) мулоқот кард.
Бино ба иттилои дафтари матбуоти Вазорати нақлиёт, зимни мулоқот масоили татбиқи лоиҳаҳо дар соҳаи нақлиёт баррасӣ гардиданд.
Вазири нақлиёти ҷумҳурӣ қайд кард, ки соҳаи нақлиёт бо БАТР ҳанӯз аз соли 2001-ум ҳамкориҳоро оғоз карда, зина ба зина онҳоро вусъат бахшид. Вазир ҳамчунин барои вусъати ҳамкориҳои минбаъда як қатор лоиҳаҳоро барои баррасӣ пешниҳод намуд.
Гуфта мешавад, сардори намояндагии БАТР дар Тоҷикистон Айтен Рустамова изҳор дошт, ки дар бисёр давлатҳо бо роҳи оҳан ҳамкориҳо доранд ва хуб мешуд, ки дар оянда бо Роҳи оҳани Тоҷикистон низ ҳамкориҳоро ба роҳ монанд.
Қобили зикр аст, ки Тоҷикистон айни замон дар сохтмони қитъаи худ дар роҳи оҳани Туркманистон-Афғонистон-Тоҷикистон ба сармоягузорӣ ниёз дорад.
Шохаи роҳи оҳани мазкур дар доираи Ёддошт дар бораи сохтмони роҳи оҳани Тоҷикистон – Афғонистон –Туркманистон, ки онро сарони се кишвар ҳанӯз моҳи марти соли 2013 имзо карда буданд, сохта мешавад.
Туркманистон ҳанӯз соли 2016 сохтмони қитъаи худро ба охир расонида, айни замон ба сохтмони қитъаи роҳ дар Афғонистон машғул аст.
Лекин бо сабаби мавҷуд набудани захираҳои молиявӣ, сохтмони қитъаи ин роҳи оҳан дар қаламрави Тоҷикистон ба таъхир афтодааст.
БАТР яке аз ташкилотҳои асосии мададрасони Тоҷикистон маҳсуб меёбад. Ин ниҳоди байнулмилалӣ барои амалисозии 135 лоиҳа дар бахшҳои гуногуни иқтисоди Тоҷикитсон 839 млн евро ҷудо кардааст.
Аввали соли равон БАТР стратегияи панҷсолаи амалиёти худро дар Тоҷикистон тасдиқ намуд, ки дар он маблағгузорӣ ба лоиҳаҳо дар самти суботи фазои макроиқтисодӣ, беҳбуди муҳити корӣ ва осебпазирӣ ба тағйири иқлим пешбинӣ шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
