Беморхонаи сироятии Душанбе, ки дар маҳаллаи Зарафшон воқеъ аст, пас аз таъмири асосӣ махсуси беморони COVID-19 шуд.
Пас аз ин, Беморхонаи клиникавии бемориҳои сироятии кӯдаконаи шаҳри Душанбе, воқеъ дар паси беморхонаи “Истиқлол” қабули беморони гирифтори коронавирусро қатъ мекунад.
Як масъули Вазорати тандурустӣ ба “Азия-Плюс” гуфт, ки Беморхонаи бемориҳои сироятии Зарафшон чанд рӯз аст, ки ба қабули беморон оғоз кардааст.
Вазорати тандурустӣ мегӯяд, ки ин бемористон таъмири асосӣ ва бо таҳҷизоти навтарин таъмин гардидааст. Ин бемористон аз 14 – уми октябр қабули беморони машкук ба коронавирусро оғоз кардааст, аммо шумораи дақиқи беморон, ки феълан беморхонаи мазкур бистарӣ шудаанд, маълум нест.
“Шумораи бемороне, ки дар шаш рӯзи фаъолияти беморхона баъди таъмир бистарӣ шудаанд дақиқ нест, чун ҳоло аз ҷониби кормандони беморхона омори онҳо ба вазорат пешниҳод нашудааст. Вале муроҷиати беморон зиёд нест”, – мегӯяд манбаъи “Азия-Плюс”.
Аз Вазорати тандурустӣ ҳамчунин гуфт, ки Беморхонаи сироятии кӯдакона низ то табобат ва ҷавоб додани охирин бемори худ дигар беморонро қабул намекунад: “Ва дар назар аст, ки беморхона баъди рухсатӣ шудани беморон ба ҳолати муқарарӣ баргардад. Ва шахсони гумонбар ба сирояти коронавирус дигар дар беморхонаи сироятии Душанбе, воқеъ дар маҳаллаи Зарафшон аз ташхис гузашта, бистарӣ мегарданд”.
Сардухтури беморхона Хуршед Ҳабибов рӯзи 26-уми август ба “Азия-Плюс” изҳор намуда буд, ки беморхона дар як вақт тавони ба мулоиҷа фаро гирифтани 390 нафарро дорад. Вале бо сабаби таъмирталаб шудани беморхона корҳои таъмириро оғоз намуданд.
“Бо сабаби ҳолати хеле бади бино ва зерсохтори беморхона, зарурат пеш омад, ки ба корҳои таъмир оғоз кунем, зеро қубурҳои обрасон хеле куҳнаву фарсуда гардида аз онҳо ба девору фарш об ҷорӣ мешуд. Аз ин рӯ, дигар беморонро қабул карда наметавонистем”, – гуфт ӯ.
Ёдрас мешавем, ки то шоми 19 октябр шумораи гирифторони коронавирус дар Тоҷикистон, бино ба маълумоти Вазорати тандурустии кишвар, 10 ҳазору 533 нафарро ташкил дода, шумораи фавтидагон аз аввали пандемия то дирӯз ин рақам 80 нафарро ташкил медиҳад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
