Донишгоҳи миллии Тоҷикистон ба ифтихори 85-умин солгарди забоншиноси маъруфи тоҷик, профессор Баҳриддин Камолиддинов конфронси байналмилалиеро бо номи “Забоншиносии расонаӣ ва услубшиносӣ: проблема ва дурнамо” баргузор мекунад. Ин конфронс фардо, 22-юми октябр дар Шаҳраки донишҷӯён, маҳаллаи Буни Ҳисорак маъруф ба “Ҷазира” баргузор мегардад.
Дар баробари ширкати олимону донишмандони тоҷик, дар назар аст, ки дар ин конфронси байналмилалӣ профессори институти забоншиносии Академияи илмҳои Русия Е. Молчанова дар мавзуъи “"Вожаҳои муосири тоҷикӣ дар бахши иттилооти илмӣ"” ва Доктор PhD-и Донишгоҳи давлатии забонҳои дунёи Ӯзбекистон Берунӣ Олимов бо номи “Мушкилоти имиҷи расонаӣ дар Узбекистон” низ ба таври онлайн суханронӣ кунанд.
Бино ба иттилои Кумитаи тадорукоти ин конфронс, аз факултаи рӯзноманигории ДМТ ҳамчунин дар бахши ифтитоҳии конфронс ширкат ва суханронии ректори ДМТ, профессор Қобилҷон Хушвахтзода, декани факултаи рӯзноманигорӣ Саъдӣ Исматов ва дигар донишмандони риштаи забоншиносии тоҷик дар назар аст.
Баъди ҷаласаси ифтитоҳӣ дар назар аст, ки конфронс дар се бахш: “Забоншиносии расонаӣ”, “Масъалаҳои услубшиносӣ”, “Рӯзноманигорӣ ва филологияи умумӣ” идома кунад, ки дар ҳамаи ин бахшҳо 56 гузоришгари илмӣ суханронӣ хоҳанд кард.
Баҳриддин Камолиддинов аз шумори донишмандони варзидаи риштаи забоншиносии тоҷик буд, ки 13-уми майи имсол бар асари беморӣ дар синни 85-солагӣ даргузаштанд.
Профессор Камолиддинов 8-уми октябри соли 1935 дар деҳаи Понғози ноҳияи Ашт ба дунё омада буд.
Фаъолияти омӯзгории ӯ баъд аз хатми Омӯзишгоҳи педагогии ш.Конибодом (1953) ба ҳайси муаллими забону адабиёти мактаби деҳаи Сарои ноҳияи Ашт оғоз ёфта, соли 1959 факултаи филологии Донишгоҳи давлатии Тоҷикистонро хатм кардаааст. Баъди хатм дар ин даргоҳи илму таълим ба кору таҳқиқ пардохта соли 1966 дар мавзӯи “Забон ва услуби ҳикояҳои Ҳаким Карим” рисолаи номзадӣ ва соли 1988 дар мавзӯи “Муродифоти наҳвӣ дар забони адабии ҳозираи тоҷикӣ” рисолаи докторӣ ҳимоя мекунад. Соли 1991 унвони профессориро дарёфт мекунанд.
Солҳои 1992-1994 ба ҳайси ноиби ректори Донишгоҳи миллӣ дар умури таълим ва то соли 2011 мудири кафедраи услубшиносӣ ва таҳрири адабии ин донишгоҳ буданд.
Профессор Баҳриддин Камолиддинов то рӯзҳои охирини умур аз илму таълим дар факултаи рӯзноманигории Донишгоҳи миллӣ канор нарафта, асарҳои бунёлдии илимву таҳқиқотӣ навиштаанд.
Марҳум Камолиддинов муаллифи асарҳои “Ҳаким Карим” (1965), “Забон ва услуби Ҳаким Карим” (1967), “Муродифоти синтаксисӣ ва ҳусни баён” (1986), “Муродифоти наҳвӣ дар забони адабии ҳозираи тоҷикӣ” (2012), ҳаммуаллифи грамматикаи илмии академиявии забони тоҷикӣ (1985, 1989), “Масъалаҳои баҳсноки наҳви забони тоҷикӣ” (2003) ва китобҳои дарсиву дастурҳои таълимии “Услубшиносӣ” (1973, ба забони дарӣ 1978, 1985), “Маҷмӯаи машқҳои синтаксиси забони тоҷикӣ” (ҳаммуаллиф, 1976, 1981), “Услубшиносӣ” (1995, ҳаммуаллифи китоби дарсӣ барои хонандагони синфҳои 10-11), “Ҳусни баён” (1989), “Хусусияти услубии сарфу наҳви забони тоҷикӣ” (1992), “Сухан аз баҳри дигарон гӯянд” (2001, 2015), “Сухандонон сухан санҷида гӯянд” (2005), “Меъёри забони адабӣ ва забони матбуот” (2007), “Сухан гуфтию дурр суфтӣ ё рӯ ба рӯ бо микрофон” (2007), “Забони тоҷикӣ” (2007, 2015, китоби дарсӣ барои хонандагони синфи 11), “Наҳви забони тоҷикӣ” (2010, китоби дарсӣ барои донишҷӯёни мактабҳои олӣ), “Чанд мушкили гузоштан ё нагузоштани вергул” (2014, 2015) ва зиёда аз 170 мақолаи илмию методӣ мебошанд.
Профессор Камолиддинов барои таҳқиқоти арзишманд дар риштаи забоншиносӣ унвонҳои “Корманди шоистаи Тоҷикистон”, “Арбоби илм ва техникаи Тоҷикистон” соҳиб шуда буданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
