Ҳукумати Тоҷикистон ба палатаи болоии парлумон пешниҳод кардааст, ки номи ҷамоат дар ноҳияи Ишкошими ВМКБ иваз шавад.
Тавре ба “Азия-Плюс” як манбаъ аз палатаи болоии парлумони ҷумҳурӣ хабар дод, аъзои Маҷлиси миллӣ ба ивази номи ҷамоати Шитхарв дар ноҳияи Ишкошими ВМКБ ба ҷамоати Вахон розигӣ дода метавонанд.
Нимаи дуюми имрӯз таҳти раёсати раиси палатаи болоии парлумон Рустами Эмомалӣ иҷлосияи навбатии Маҷлиси миллии Маҷлиси Олии Тоҷикистон доир мегардад.
Ба ҷуз масъалаи дар боло зикршуда, аъзои Маҷлиси миллӣ масъалаи тағйироти кадриро дар Суди Олӣ ва Суди конститусионӣ, ки аз ҷониби президенти мамлакат Эмомалӣ Раҳмон пешниҳод шудаанд, низ баррасӣ мекунанд.
Президент ба аъзои Маҷлиси миллӣ пешниҳод намудааст, ки судяи Суди конститутсионӣ Даврон Ҳошимзода, судяҳои Суди Олӣ Бахтулло Раҳматуллозода ва Давлатмо Додихудозода аз мансабҳояшон бозхонд карда шаванд.
Манбаъ дар парлумон сабаби пешниҳоди сарвари давлатро дар бораи бозхонд шудани онҳо шарҳ надод.
Ғайр аз ин, имрӯз аъзои Маҷлиси миллӣ зиёда аз 20 тағйироту идоваҳоро ба қонунҳои гуногуни ҷумҳурӣ, ки қаблан аз ҷониби вакилони палатаи поёнии парлумон тасдиқ шуда буд, низ баррасӣ мекунанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
