Ҳавопаймои ширкати Belavia субҳи имрӯз бар асари тумани ғализ натавонист ба фурудгоҳи Душанбе нишинад. Ҳайати сарнишинони ҳавопаймо тасмим гирифт, ки то пароканда шудани туман дар фурудгоҳи Душанбе, ҳавопайморо дар Тошканд менишинонад, хабар доданд ба “Азия-Плюс” аз Фурудгоҳи байнулмилалии Душанбе.
“Дарвоқеъ ҳам ҳавопаймои ширкати Belavia airlines-и Беларус бо сабаби тумани ғализ дар фурудгоҳи мо нишаста натавонист ва ба самти Тошканд, ба фурудгоҳи эҳтиётӣ раҳсипор шуд. Бо беҳтар шудани вазъи ҳаво ҳавопаймо соати тақрибан 14:00 ба Душанбе баргашта, муваффақона фуруд омад. Худи ҳамин рӯз пас аз борашро гирифтан, ҳавопаймо ба Минск парвоз мекунад”, – хабар доданд аз дафтари матбуоти фурудгоҳ.
Корбари “Азия-Плюс” Бахтиёр Қодиров скриншотеро аз сомонаи Flightradar ба идора фиристод, ки дар он чӣ гуна соати 09:40 ба Душанбе фуруд омада натавонистан ва баъди чанд дафъа даврзанӣ ба фурудгоҳи Тошканд роҳ пеш гирифтани ҳавопаймои ширкати Belavia airlines дида мешавад.
Ёдрас мекунем, ки аз охири моҳи март бо сабаби пандемияи коронавирус Тоҷикистон парвозҳо бо ҳамаи хатсайрҳои мунтазамро қатъ намуд. Аз Душанбе айни замон танҳо ба самтҳои Истанбул ва Дубай парвозҳои байнулмилалӣ анҷом дода мешаванд.
Ҳамчунин барои ба ватан баргардонидани шаҳрвандони Тоҷикистон аз Русия ва шаҳрвандони Русия аз Тоҷикистон як қатор парвозҳои чартерӣ байни кишвраҳо роҳандозӣ шуд. Охири моҳи ноябр ширкати “Сомон Эйр” ба иҷрои парвозҳо тариқи хатсайри дохилии Душанбе-Хуҷанд низ оғоз кард.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
