Аз аввали соли 2021 содиркунандагони сабзавоту мева аз Тоҷикистон ба Русия, ки борашонро тариқи роҳи оҳан интиқол медиҳанд, барои боркашонӣ аз тахфифҳо (поинравии нарх) истифода хоҳанд бурд.
Ширкати «Российские железные дороги» (РЖД) 21 декабр дар сомонаи расмии худ қарор дар бораи поинравии тарифҳо ба боркашониро нашр кард. Онҳо ба кашонидани молу маҳсулот, аз қабили фулузот (металлҳо)-и сиёҳ, контейнер, конрейлер ва сабзавоту мева дахл доранд.
Аз ҷумла, аз 1 январ то 31 декабри соли 2021 тахфифҳо ба андозаи 50% ба боркашонии воридоти сабзавоту мева аз Тоҷикистон ва Ӯзбекистон ба Русия дар қатораҳои мансуб ба ҶС «Ӯзбекистон темир йӯллари» ва КВД «Роҳи оҳани Тоҷикистон» амал мекунанд.
Коэффисиенти поинмерафта бо шарти озод кардани РЖД аз пардохт барои истифода аз қатораҳои мансуб ба ин давлатҳо, ки дар боркашонӣ истифода мешаванд, амал мекунад.
Қобили зикр аст, ки соли 2018 низ РЖД барои интиқоли сабзавоту мева аз Тоҷикистону Ӯзбекистон чунин тахфифи 50%-и ҷорӣ карда буд.
Бино ба маълумоти Вазорати кишоварзӣ ва Хадамоти гумруки ҷумҳурӣ, дар зарфи 10 моҳи соли ҷорӣ аз Тоҷикистон ба маблағи беш аз 17 млн доллар зиёда аз 120 ҳазор тонна маҳсулоти кишоварзӣ ба хориҷи кишвар содирот шудааст, ки нисбат ба ҳамин давраи соли гузашта маблағаш 5,5 млн доллар зиёдтар аст.
Ҳиссаи назаррасро дар таркиби содироти сабзавоту мева аз Тоҷикистон пиёз, хушкмева ва ангур ташкил медиҳанд. Ин маҳсулот дар бозорҳои Русия, Қазоқистон, Чин ва кишварҳои Иттиҳоди Аврупо ба фурӯӯш гузошта мешаванд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
