Маркази назорати давлатии санитарию эпидемиологии вилояти Суғд ба далели вазъи нохуби беҳдоштӣ дар 11 моҳи соли 2020 барои риоя накардани меъёрҳову талабот бештар аз 1000 нафарро ҷарима бастааст, ки маблағи он 205 ҳазору 807 сомонӣ ҳисоб шудааст.
Ҳамчунин ин Марказ фаъолияти 894 коргоҳро бинобар ҷавобгӯ набудан ба меъёрҳои санитарӣ муваққатан боз доштааст. Ин иттилоъро як мнбаъ аз Маркази назорати давлатии санитарию эпидемиологии вилояти Суғд дар ихтиёри “Азия-плюс” қарор дод.
Бино ба иттилои масъулони беҳдоштии вилоят, дар ин давра аз ҷониби мутахассисони Маркази назорати давлатии санитарию эпидемиологӣ дар шаҳру навоҳии вилоят дар маҷмӯъ фаъолияти 1114 адад бозору нуқтаҳои савдо, муассисаҳои таълимӣ ва дигар иншоот мавриди санҷиш қарор гирифтааст.
Ҳарчанд ки ба гуфти мутахассисон, вазъи эпидемиологӣ ҳоло дар вилоят нисбатан беҳтар шуда бошад ҳам, аммо ҳанӯз ҳолатҳои сарфи назар намудани қоидаҳои беҳдоштӣ ба назар мерасанд.
Ҳукумати вилоят ҳам ҳафтаи гузашта бо таъсиси комиссияи вижа давоми се рӯз нуқтаҳои фурӯши маҳсулоти хӯрокворӣ, сифати маҳсулот ва вазъи беҳдоштии бозорҳои “Панҷшанбе” ва гирду атрофи он – “Афросиёб”, “Неъматуллоҳ” ва кӯчаи Шарқро мавриди санҷиш қарор дод, ки мақсад аз он пешгирии бемориҳои сироятӣ, махсусан коронавирус гуфта мешавад.
Маҷнун Орипов, муовини сардори Маркази назорати давлатии санитарию эпидемиологии вилояти Суғд гуфт, ки дар ин санҷишҳо 12 соҳибкорро ҷарима бастаанду онҳоеро, ки маҳсулоти хӯрокии нозукро дар сари роҳҳо мефурӯхтанд, бо қоидаҳои беҳдоштӣ ошно кардаанду маҳсулоташонро аз савдо гирифтаанд.
Вилояти Суғд аз оғози давраи ҳамагирии коронавирус яке аз осебпазиртарин минтақаҳои Тоҷикистон буд, ки бо гузашти 8 моҳ дар маркази вилоят бархе аз муассисаҳои бахши тандурустӣ тоза ба кори муқаррарии худ баргашта истодаанд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
