Президенти Тоҷикистон Эмомалӣ Раҳмон ба раҳбарияти Бонки миллии ҷумҳурӣ дастур дод, ки санадҳои меъёрии ҳуқуқии дахлдорро бо дарназардошти таҷрибаи муосири ҷаҳонӣ ба талабот мутобиқ сохта, раванди идоракунии корпоративиро дар ташкилотҳои қарзии молиявӣ ва тадриҷан афзоиш додани сармояи ойинномавии онҳоро таъмин намоянд.
Сарвари давлат ҳамчунин сабаҳои асосии фаъолияти ғайриқаноатбахши низоми бонкии кишварро номбар кард.
“Нокифоя будани ҳаҷми қарздиҳӣ ба соҳаҳои иқтисоди миллӣ, низоми сусти идоракунии корпоративӣ, зиёд будани хавфҳои амалиётӣ ва қарзӣ, боқӣ мондани қарзҳои ғайрифаъол, кофӣ набудани ҷалби сармоя ба низоми бонкӣ ва таъсиси намояндагии бонкҳои хориҷӣ ҷиҳати беҳтар намудани маблағгузории корхонаҳои истеҳсолӣ аз ҷумлаи камбудиҳое мебошанд, ки бояд ҳарчи зудтар бартараф карда шаванд”, – изҳор дошт ӯ зимни ироаи паём ба парлумон.
Ҳамчунин президент ба зарурати беҳбуди сифати дороиҳо дар низоми бонкӣ ва афзоиши ҳаҷми қарзҳои дарозмуҳлат ба корхонаҳои истеҳсолӣ ишора кард.
Ӯ дастур дод, ки барои ҷалби сармоягузорӣ ба низоми бонкӣ ва тавсеъаи шумори хизматгузориҳои бонкӣ бо ҷорисозии технологияҳои муосири молиявӣ ва инноватсионӣ ҷораҷӯйӣ шавад.
Зарурати роҳандозии чунин тадбирҳоро президент бо таъмини пурраи амалиёти ғайринақдӣ, ки тариқи он метавон омилҳои инсониро зимни ҳисоббаробаркуниҳои пулӣ бо аҳолӣ аз байн бурд, асоснок кард.
Зимнан Эмомалӣ Раҳмон ба болоравии сатҳи даромад ва эътимоди мардум ба бонкҳо ишора намуда, қайд кард, ки соли гузашта ҳаҷми амонатҳо дар низоми бонкӣ ба андозаи 17,2% – то 11,4 млрд сомонӣ зиёд шуд.
“Дар соли сипаришуда аз ҷониби ташкилотҳои қарзӣ ба соҳаҳои гуногуни иқтисоди кишвар қариб 10 млрд сомонӣ қарз дода шуд, ки нисбат ба соли 2019–ум 4,6 фоиз зиёд мебошад”, – афзуд сарвари давлат.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
