Дар Ӯзбекистон бори нахуст намуди нави коронавируси “бритониёӣ” муайян шудааст. Дар ин бора торнамои kun.uz бо такя ба Хадамоти матбуотии Вазорати тандурустии Ӯзбекистон ва муовини вазири тандурустӣ Баҳодир Юсупалиев хабар додааст. Намуди нави коронавируси “бритониёӣ” рӯзи 23-уми январи соли 2021 аз як духтарчаи 10-сола, ки ҳамроҳи хонаводааш аз Аморати Муттаҳидаи Араб ба Тошканд баргаштааст пайдо шудааст.
“Тибқи тартиби муқарраршуда, вақте ки шаҳрванд дар фурудгоҳи байналмилали Ӯзбекистон бо усули экспресс озмоиш мешаваднатиҷаи ташкиси ӯ мусбат баромад. Бемор фавран бо мошини ёрии таъҷилӣ ба беморхонаи сироятӣ интиқол ёфта худи ҳамон рӯз ӯ аз муоинаи функсионалӣ-клиникӣ гузаронида шуд ва ташхиси асимптоматикии беморӣ муайян карда шуд”-
Муовини вазири тандурустии Ӯзбекистон Баҳодир Юсупалиев гуфтааст, дар айни замон вазъи умумии бемор духтарчаи 10-сола қаноатбахш аст, ӯ шикояте надорад ва тибқи стандартҳои тиббии дахлдор табобат мегирад. Натиҷаи ташхиси аъзои хонаводаи бемор, ки ҳамроҳ буданд манфӣ баромада онҳо дар карантини хона мебошанд, гуфтааст ӯ.
Вазорати тандурустии Ӯзбекистон аҳолиро ба ҳушёрӣ даъват карда талаб кардааст, ки ниқоби тиббиро дуруст ва мунтазам дар ҷойҳои ҷамъиятӣ ва корӣ пӯшанд, масофаи иҷтимоиро нигоҳ доранд ва дастҳоро бештар бо собун шӯянд. Вазорат дар як изҳорот аз шаҳрвандони Ӯзбекистон хостааст дар ҳолати зарурӣ муваққатан аз сафар ба хориҷи кишвар худдорӣ кунанд.
Нимаи моҳи декабри соли 2020 дар Бритониё вируси нави коронавирус ошкор шуд ва аксари давлатҳо парвозҳои ҳавоӣ бо ин кишварро қатъ кард. Ӯзбекистон низ барои таъмини суботи эпидемиологӣ то 1-уми марти соли равон парвозҳои байналмиллаӣ бо кишварҳои Бритониё, Италиё, Олмон, Дания, Утриш, Австралия, Нидерланд ва Африқои Ҷанубиро қатъ кардааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
