Дар доираи амалиёти шартии “Корд”, ки аз охири соли 2019 дар қаламрави шаҳри Душанбе ҷараён дорад, дар кӯчаи Убайди Зоконии пойтахт Алиакбар Эмомов, сокини 26-солаи ноҳияи Рӯдакӣ боздошт шуд.
Тавре дафтари матбуоти Раёсати ВКД Тоҷикистон дар шаҳри Душанбе хабар медиҳад, боздоштшуда ба фурӯш ва паҳнкунии ашёҳое, ки ба сифати силоҳи сард истифода шуда метавонанд, машғул будааст.
“Дар натиҷаи санҷиш ва азназаргузаронии фурӯшгоҳи мазкур зиёда аз 30 адад чунин предметҳои ба сифати силоҳи сард истифодашаванда дарёфту мусодира карда шуданд”, – қайд мешавад дар маълумоти Раёсат.
Гуфта мешавад, нисбати боздоштшуда санад дар бораи ҳуқуқвайронкунии маъмурӣ тартиб дода шуда, суд ӯро ба 5 шабонарӯз ҳабси маъмурӣ маҳкум кард.
https://www.youtube.com/watch?v=ezgLtbJpZIQ
Ёдрас мекунем, дар мақомоти милитсияи пойтахт амалиёти шартии “Корд” ҷараён дорад, ки дар рафти он тадбирҳои аз аҳолӣ, бахусус, ҷавонон дарёфт кардан ва мусодираи яроқи сард, аз ҷумла, корду кастет, электрошоку чӯбдастҳо ва ғайра роҳандозӣ шудааст.
Ҳолатҳои зӯроварӣ ва муноқишаҳо бо истифода аз яроқи сард ахиран дар Тоҷикистон зиёд рух медиҳанд. Коршиносон бар ин назаранд, ки бепарвоӣ ва хунукназарии волидону омӯзгорон ва ҳамаи аҳли ҷомеа сабаби аслии афзоиши падидаҳои манфӣ миёни ноболиғон шудааст.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
