Сардори Ситоди Қувваҳои мусаллаҳи Эрон генерал-майор Муҳаммад Боқирӣ рӯзи панҷшанбе изҳор дошт, ки Эрону Тоҷикистон дар бораи таъсиси Кумитаи муштараки мудофиа ва ҳарбӣ тавофуқ ҳосил кардаанд, хабар медиҳад ИРНА.
Пас аз вохӯрӣ бо вазири мудофиаи Тоҷикистон генерал-полковник Шералӣ Мирзо, ки дар Эрон қарор дорад, генерал Боқирӣ гуфтааст, Кумита ҳамкориҳои ҳарбии минбаъда ва робитаҳои дуҷониба дар соҳаи мудофиаи кишварҳоро муайян ва танзим мекунад.
Ӯ зикр кардааст, ки сафари вазири мудофиаи Тоҷикистон ба Теҳрон барои тавсеъаи ҳамкорӣ миёни Тоҷикистону Эрон замина гузошта, ин ҳамкорӣ байни Қувваҳои мусаллаҳи давлатҳо ба таҳкими таъмини амният ва суботи минтақавӣ мусоидат мекунад.
Пас аз вохӯрии дуюми вазирони мудофиаи Тоҷикистону Эрон вазири мудофиаи ин кишвар Амир Ҳотамӣ зимни нишасти хабарӣ изҳор намуд, ки барои ҳамкории кишварҳо дар соҳаи таъмини амният ва мудофиа бисёр асосҳои гуногун мавҷуданд.
Амир Ҳотамӣ гуфт, Эрону Тоҷикистон ба мисли дигар кишварҳои минтақа ба чолишҳои террористӣ осебпазиранд ва бо дастгирӣ аз ин гуфтаҳои ӯ Шералӣ Мирзо иброз дошт, ки самаранокии мубориза бо терроризм дар минтақа ба густаришгиҳамкориҳои давлатҳои минтақа вобаста аст.
Эрон бемамониат таҳҷҳизоти мудофиавӣ содирот карда метавонад
Қаблан зимни вохӯрӣ бо ҳамтои точики худ Ҳотамӣ изҳор намуда буд, ки таҳримҳои байнулмилалӣ нисбат ба фурӯши таҷҳизоти соҳаи мудофиаи Эрон соли гузашта бекор шуда, акнун дар ин самт ҳеҷ монеъае нест.
“Хушбахтона, маҳдудияти байнулмилалии фурӯши силоҳи Эрон моҳи октябри соли 2020 бар асоси қатъномаи 2231-и Шӯрои амнияти СММ хотима ёфта, акнун дар содироти молу таҷҳизоти мудофиавӣ Эрон дигар ҳеҷ мушкиле надорад”, – гуфт вазири мудофиаи Эрон.
Ӯ ба масъалаи ҳузури гурӯҳҳои террористӣ, аз қабили ДОИШ дар баъзе кишварҳои минтақа дахл карда, таъкид дошт, ки Эрон мудом ҳама гуна дахолати кишварҳои фароминтақавиро бо баҳонаи мубориза бо терроризм рад мекард.
Генерал-полковник Шералӣ Мирзо дар навбати худ таъкид дошт, ки Тоҷикистон ба густариши ҳамкориҳо бо Эрон дар соҳаҳои гуногун, аз ҷумла сиёсиву ҳарбӣ ва мудофиавӣ омода аст.
“Ҳамкории Тоҷикистону Эрон дар таъмини сулҳу субот дар минтақа, мубориза бо терроризим ва гардиши ғайриқонунии маводи мухаддир, инчунин таҳкими амнияти минтақавӣ хеле муҳим аст”, – гуфт Шералӣ Мирзо.
Қобили зикр аст, ки вазири мудофиаи Тоҷикистон генерал-полковник Шералӣ Мирзо рӯзи сешанбеи ҳамин ҳафта бо даъвати расмии вазири мудофиаи Эрон Амир Ҳотамӣ ба Теҳрон омад.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
