Дастаи футболи “Истиқлол”-и Душанбе нимаи аввали рӯзи 11 апрел ба Арабистони Саудӣ расид. Дар ин ҷо даста дар марҳилаи гурӯҳии Лигаи қаҳрамонҳои Конфедератсияи футболи Осиё (КФО)-2021, ки дар шакли мутамарказ доир мегардад, иштирок мекунад.
Тавре дафтари матбуоти даста хабар медиҳад, бозии аввали даври гурӯҳии қаҳрамони футболи Тоҷикистон рӯзи 15 апрел доир мегардад.
Ёдрас мекунем, ки дар гурӯҳи “А”-и марҳилаи гурӯҳии Ҷоми КФО-2021 “Истиқлол” бо дастаҳои “Ал-Ҳилол” (Арабистони Саудӣ), “Шубоб Ал-Аҳлӣ” (АМА) ва тими АГМК (Ӯзбекистон) рақобат мекунад.
Ҳамаи бозиҳои марҳилаи гурӯҳии Ҷоми КФО-2021 дар як вақт – соати 22:00 (00:00 бо вақти Душанбе) оғоз гардида, дар ду варзишгоҳ – Варзишгоҳи байнулмилалии ба номи Шоҳ Фаҳд ва Варзишгоҳи ба ном Шоҳзода Файсал бинни Фаҳд дар шаҳри Ар-Риёз баругзор мешаванд.
Дар бозии нахустини худ дар марҳилаи гурӯҳии мусобиқаи пурнуфузарини бошгоҳии осиёӣ “Истиқлол” рӯзи 15-уми апрел бо дастаи футболи «Шубоб Ал-Аҳли Дубай»-и Амороти Муттаҳидаи Араб вомехӯрад. Марҳилаи гурӯҳии мусобиқаи асосии бошгоҳии Осиё дар минтақаи Ғарб ба шакли мутамарказ аз 14 то 30 апрел баргузор хоҳад шуд.
Тибқи Тартиби баргузории ин мусобиқа, аз рӯи натиҷаи ҷамъбасти марҳилаи гурӯҳӣ ба бозиҳои 1/8 ниҳоӣ ҳамаи ғолибони панҷ гурӯҳ ва боз се дастаи нишондодашон беҳтарин аз ҳамаи гурӯҳҳо роҳ меёбад.
Дар ҳайати тими “Истиқлол” дар марҳилаи гурӯҳии ин мусобиқаи пурнуфузтарини Осиё дар минтақаи Шарқ 24 бозингар, аз ҷумла 4 легионер аз Украина, Ҷопон ва Голландия бозӣ мекунанд.
Ҳайати дастаи “Истиқлол”-ро дар фурудугоҳ намояндагони Кумитаи тадорукоти Лигаи қаҳрамонҳо ва кормандони сафоратхонаи Тоҷикистон таҳти сарварии сафири Тоҷикистон дар Арабистони Саудӣ Акрам Каримӣ самимона истиқбол намуданд. Ҳамаи аъзои ҳайат бо расидан ба меҳмонхона тести сироят аз коронавирус супориданд.
Лутфан, хабари муҳим, суол ва аксу видеоҳои ҷолибро дар бораи масоили ҳалталаби ҷомеа ба Asia-Plus тариқи Viber, Telegram, Whatsapp, Imo бо рақами +992 93 792 42 45 фиристед.
Дар Telegram, Facebook, Instagram, Viber, Яндекс.Дзен, OK ва Google Новости бо мо бимонед.
